Naga yimten tenük sakba

Naga nunger tangar khu bener France lima tashi aoba sülen taküm 2017 küm agi küm 100 ajungba temaitsü Kohima nung long ka azünga amongtsü bilemtetbaji junga bilemtetogo. Atangji, Naga nunger France limai aobaji merataket otsübo masü kechiyong tangar khu bener aoba otsü dang lir. Ajisüaka, Naga nunger yimten tenük lapoka nüchi küma aruba mapa aser mapangjibo tangar khu bener jajaba mapang ya liasü. Ashi, 1917 küm tangar khu bener Europe lima tashi aotsü mapang ya maru asübo tang tashi Naga nungertemi pei yimten temeten memetet aser merajemi tangar bendanger kübok kasa khu bener amai lila ta bilemer. Aji oda, Naga nungertemi Naga nungertema ta memeteti alidang 1872 küm Naga limai Khristan yimsü aru. Iba jagi Naga nunger, talisa Aortem sobaliba tamajung aika melenshia shirurutem den kecha balaka mepilai aliba tia nungi nüchi küma lia aotsü tenzük. Ajisüaka, 1917 küm alima mezüng tongpang nung Naga nungertem British nunger khu bentsür France limai mao tashibo Naga nunger shisatsü nung Naga kintem ajak longjemer British nunger ama yimten ka kümteta temzüng ozüng ka kübok alitsüla ta merajemi aru. Atangji, Naga nungertem among adena tangar khu bener ayazüka mao tashibo pei yimtsüng aser pei kinji dang alima tatem ama bilema külemi longjemer Naga lima külem yimten ka yangertsübaji pongmang nunga mepongmangba mapang ka liasü südi. Aji oda, alima nung timtem agi aleper temoatsü aser maongka arur süra Naga lima nung France tashi tangar khu bener aotsüsa akümba timtemji Naga nungertem asoshi yimten nüchiso tenük lapoktsüba maongka anguba mapang ka liasü. Iba mapangang Naga nunger o Naga nunger nata ajurutepa metettep aser oshioben balala süaka shilubo kasa, anungji tapokdakbo ka dang asütsü ta tangatetba nung parnok o parnok na chichiba tedi tenu ama bilemtepa bendanglen timtem mapang maparen aisü nung yariteper alitsü. Iba jagi parnok rongnung tali telongjem adoka Naga nunger longjemer yimten  jenjang ka latettsü asoshi nüngdakba indang ken o süka jembi südi. Aji oda, 1918 kümbo Naga lima tonga arur, pi khu benertemto pei nübortem anitetsü asoshi tanishir kümer Naga Club tenzük. Naga kintem asoshi telongjem ka tenteta alima dang Naga kin lir ta metetdaktsübaji Naga Club tenzüka Naga nunger lokti nüngdak aser yimten temeten indang jembi tenzükba ajanga liasü. Atangji, kasa mapang nung India nungertema British yimten talenba nungi salatsü asoshi prangpong injang amshia masü saka Mahatma Gandhi nungertemi anir tangatetba aser raraba mapang ka liasü. Ibaji mesüka Naga nungertemia tangatetba agi, kodang 1929 küm British yimten ajanga India yimten tia reprangdangtsü asoshi Simon Commission yok, parnok dang Naga nungertembo India kübok mesüi balaka sadoksadoka linüba tejangraba aser temeten Naga Club  ajanga metetdaktsü. Küm 100 jakdang Naga nunger tangar khu bener France tashi orr arua Naga nunger telongjem ka tentetter Naga nunger tarutsü lanurtem asoshi yimten nüchiso jenjang ka latettsütsü nüngdak ta angateta jembiba shisatsüji kanga tulu liasü. Atangji, Naga nunger khu bener France-i aoba anogojia tongtibang saka ano parnok France nungi arur külen Naga Club tenzükbajisa tongtibangba.  Aji oda, 1918 küm Naga Club tenzük süra sangküm 2018 küm Naga Club küm 100 ajungtsü. Ibaji Naga yimten nüchiso asoshi rara tenzüker küm 100 ajunger asütsü.  Kohima nung tamalen Naga Club pur ki asüba nung tang NSF office lir. Atangji, tanübo tenüng dang ashi, Naga Club mali kümogo. Ajisüaka, maliyonga lir amato aser Naga club tenzükertemjia tanü asenok den taküm ali amato bilema Naga Club centenary ayongzüka mongra, ibaji Naga nunger asoshi yimten asentenshi mapang ka asütsü. Naga Club centenary ya NSF teloki Naga nunger kin aser tenüng tajung akaba lokti tentet shia telongjem nungi lenirtem jadena sentong yanglur mongra, ibajiang tapetba, tajungba aser temoatsüba asütsü.