Naga yimten timi latettsüla: NPF

Dimapur, October 23 (TYO): October 23, 2019 nü Naga People’s Front (NPF)-i Legislature Wing, Core Committee, lennir tejentem aser telok balala nungi lennirtem den Consultative meeting ka amen.
Senden nung tanü yimtenren tensa ajurua aliba indang olemtepdang NPF-i teti Indo-Naga yimten tebilemtsü latettsüba asoshi pusema aruba lemsatep.
Iba jagi India sorkar aser NSCM (I-M) tsüngda August 3, 2015 nü ‘Framework Agreement’ sign asüba NPF-i pelaa agizük. Maneni, 2017 küm tatemlen NNPGs 7-i yimjung olemtep nung adenba pela agizük, ta NPF-i sangdong ka nung metetdaktsü.
Ajisüaka, küm 22 tashi olemtepa aruba sülen NSCN-IM aser GOI Interlocutor aser Nagaland Governor R.N. Ravi tsüngda obang meputep adokba atema mepelar, ta parnoki ashi.
India-i 16-Point Memorandum ama Agreement ka nung sign masütsü ta onoki amanger, kechiyong taoba mapang India sorkari telok tongtitem den masü saka tetsüngda nung inyakba telok den ang Agreement sign sütep aser iba ajanga telemsa ang tali adokdaktsü. Anungji, taoba mapang aibelenba ama India sorkari tanaben aibelen masütsüla, ta parnokisa metetdaktsü.
Temulung lemteptsü atema tongti teloktem den dang tenangzüktep agitsüla. India sorkari Naga yimten latettsü atema tetuyuba magütsütsüla saka anepalua aser süoiki ia bilema yimjung nung angatetteptsüla, ta NPF-isa ashi.
Indo-Naga yimten tebilemtsü nung PDA-i kechi shilem agir’ar onoki memetet saka NPF-ibo maneni tiyongtsü nung yariteper ka ama inyaktsü. Aibelena inyakra, ibaji telok ka atema dang masü saka yimjung maparen nung sendaka alirtem ajak atema timtem asütsü, ta NPF-isa metetdaktsü.