Naga yimten ya memenui latettsüla: Governor R.N Ravi

August 16, 2019 nü NBCC Convention Centre Kohima  nung Nagaland Governor R N Ravi aser pa kinungtsü Laxmi Ravi nati Naga nunger sobaliba sübotsür agir Chief Minister Neiphiu Rio aser kinungtsü, Deputy Chief Minister Y Patton aser tangartem den külemi agiba noksa ka angur. 

Kohima, August 16 (TYO): Indo-Naga yimjung olemtep ya matsülangtsüla kechiyong Naga nunger tenüng nung aser India sorkar tenüng o jembirtem tsüngda onük ajak angatettepogo ta Nagaland Governor, R N Ravi-i ashi.
“Onok ajak angatettepogo aser kecha anünga mali. Onok (Naga aser India atema jembirtemi) tsüngda angatettepogo. India sorkari Naga nunger putiotsü agizükogo aser ibaji tashi lemsateptsü aser telok ana tsüngda yimchiyimjung nung alitsü atema lir” ta Ravi-isa ashi.
Kin hohotem aser civil society temi tanü NBCC Convention Centre nung Nagaland Governor tasenba atema lokti sentong ka ayongzüka agidang Ravi-i iba onük jembi.
August 1, 2019 nü Gauhati High Court nung Chief Justice (Acting) Arup Kumar Goswami-i Ravi nem tezüngzüktep agidakja liasü.
Ravi ya Naga yimjung olemtep atema Centre indang interlocutor lir aser pai ashiba agi “mapang talangka Naga yimten tebilemtsü melateti aruba ajanga Naga nunger taküm shia asoshi tammang tia ka bentsür arua lir. Iba tammang ya samatsüla kechiyong Naga nungeri anü tesangwa nüngdaker.”
“Linük kanga dang kara tejakleni aodang Nagaland nung alirtembo tang nüngdakba tem mali timtemba angudang temulung raksar. Naga nungertemi lenmang tajung nüngdaker, power supply shitak nüngdaker, education tajung, health care aser lanurtem asoshi mapa nüngdaker” ta Governor-i ashi.
“Reprangdangra linük nung tesem aika dang nungi Nagaland nung ali rongsen talila moaja lir aser tangar dang nungi Naga lanurtem dak sempet tajungba lir” ta paisa shisem.
“Yimten tebilemtsü ya taoba küm 22 tashi angatetteptsü meranga aru aser kodang Prime Minister Narendra Modi-i iba onük atema mapa inyaktsü tenzük, onoki taoba mapang inyakba meyipa reprangdang. Tesüiba mapang tangatetba tajung nung kanga dang meranga inyak saka langka ka meshitak liasü” ta Ravi-isa metetdaktsü.
“Iba maparen nung Naga telungpur telok ajak, Naga kin hohotem, Naga civil society tem, lennirtem, shisashirtem, senso aser Naga MLA tem maden liasü. Naga yimten tebilemtsü ya Naga nunger ajak indang lir aser telok shingaia iba onük atema kibur küma mali” ta paisa shisem.
PM Modi-i ni interlocutor inyaktsü shimdang Naga yimten tebilemtsü ya kasa tangatetba nung aser akhümtsübutepa latettsüla ta tetuyuba agütsü. Iba tangatetba nung olemtep tejakleni ogo aser alizüng aika ajangtetogo aser Naga telungpur telok ajunga amai yimjung olemtep nung denogo, ta RN Ravi-isa ashi.
“Narendra Modi-i kümsük tanabuba atema Prime Minister inyakba sülen aser ni yangi Governor inyaktsü atema marudang ni pa dang yimjung maparen ya ita asem tsüngda tembangtsüla ta ashi” ta paisa metetdaktsü.
“Asenok tesüiba küm 22 tashi olemtepa arur aser taoba küm 5 tsüngda sendaka alirtem ajak anioker asenoki mapa tulu inyakogo aser telok anaprongi pei tajungtiba agüja meranger, anungji asenoki iba yimjung olemtep tembangtsüla ta ni Modi dang ashi” ta Ravi-isa shisem.
“Nagaland den kidanger state nung alirtemi indang tebilemba onoki meteta lir. Naga nunger aliba tesemtem lokteptsüba anema onoki menoktaker aser ibaji onoki pelashishia agizükogo. Naga nungeri democratic political process ajanga ka akümtsübaji tim aser iba temetenji nenok ket nung lir” ta Nagaland Governor-isa metetdaktsü.
Arrla 370 aser 371(A) ji khenyongi balala kechiyong Arrla 370 ya Jammu & Kashmir asoshi mapang tatsüka atema latetba lir. Arrla 370 ya teti atema latetba masü aser iba arrla kübok clause 3 nung ajemdaker president-i iba Arrla agientsü akok, ta Ravi-i ashi.
Arrla 371(A) ya Nagaland nung alirtem aser India sorkar tsüngda küm 3 tashi olemtepa aruba sülen latetba lir. Iba ya India sorkari Naga nunger tsüngdang tenangzükba agiba lir aser iba ya temeshi lir, ta paisa shisem.
Anungji Nagaland nung alirtemi Arrla 371(A) atema shisa mebulutsüla. Onoki 371(A) nung shia aliba dang nungi tajungba ka latettsü meranger aser iba arrla ya magientsü saka tali tashi itdaktsütsü, ta Nagaland Governor R.N Ravi-ia ashi.
“Nagaland nung Governor ka ama ni kü tajungtiba agi Naga nunger tenzüktsü” ta paisa tenangzükba ka agi.
Tanü iba sentong nung R.N Ravi kinungtsü Laxmi Ravi aden.