Naga yimten ya tangsa tang latettsüla

Shitakba agibo, tanü tashi alima nung ya Naga nunger ta asüba kin ya kin chanu tapu kwiar mejangjatetter, saka iba onükji yutsür, tang Naga nunger yimten nüjiso bushir teloktem rongnung telemsa adokpet adoka telok balala razüka aoba yagi alima tsüngdang taaktsüka kümogo. Shidi asü nungbo, tangbo linük nüchiso bushirtem ajak India den yimjung nung alir asünungji, kecha tetsübu aser tarendak makai tema nung, pei kinunger aser yimtsür yimertem den külemi lia pei kibong asoshia mapa inyaktsü mapang angur. Ano, Naga nunger yimten nüchiso bushir teloktem temang ka küma melongjemtetaka, telok ajak pei pei meten India den yimjung nung yimten ken o jembi tenzüker joko mapang talangka arur aser telok teimbaka den ken o tatemleni arua jembiba angashir aser tanüngba telok dena yakta ken o tangatettep kati arua tembangtsü imlaseta atar. Iba tangatetba nung, Nagaland nungbo assembly nung opposition-a mali küma tema nung alir yimten telokbo ajak ka küma longjemogo. Ajisüaka, yimten nüchiso bushirtem rongnung longjemtsü melen telokang tali teimba küma telemsa adokra, Naga yimten nüchiso angutsüba maparen nung shingaia meyaritettsü. Shitakba bilemdangdi süra, telok tenet ti tashi lemsar Naga nunger asoshi yimten nüchiso bushiba mapaji suwar mapa lir. Iba jagi asenok nüchi akümtsü melena yiar kümadoker. Joko, asenok Naga nungertem yimten nüchiso asoshi rarararaa kechi atema asenok raraer mejangjatetka kümogo. India-ibo tangsa asenok den Naga yimten tebilemtsü ya tatem küma latetner, saka asenoki maritepner ta asüba asenok temulungjangji angatettsü tasak. Aji oda, Naga yimten telatetba tasen kati marutet küm ka süli, Naga nunger yimten nüchiso bushir teloktem rongnung tanishir ka süli, ano küm ka süli, tanishir ka süli ta joko akhidang Naga yimten nüchiso asoshi taküm ajak bendanga agüja tenzüka arur lenirtembo ajak sümadagi. Joko, asenok arem nung ali chia aser süngo tu mejaka aser ayong tzü tazü jema linük asoshi rarar masü saka asenok  India government-i lemzüktsüba ‘designated Camps’ nung lia Naga yimtem nüchiso atema India den jembir. Joko, designated camp nung alidang asoba chirnurtema teka agi jeta peisasa pei taküm lia otettsüsa tain kümogo. Item jagia Naga parnok tarutsü anogotem asoshi kechi ashir, aji kanga tongtibang asütsü. Asenoki tuluka bilemyonga, India government-i lemzüktsüba designated camp nung lia India government-i agütsüba Identity Card aser Passport benerbo Naga yimten nüchiso asoshi talangka jembia moutettsü.  Iba tia aser jenjang jagi asenok dang tekaratiba nung India den Naga yimten jenjang tasen ka lateta adoktsü ashir. Tanü aliba jenjang yagibo asenok nem pei tetsü tasoli meimba indang shisatsü masü peisasa pei taküm aser pei kibongang meimba shisatsüang ka inoktsür. Iba jagi, aikati linük tenzükba mapa nung makamait aser timtem maremer. Yimten nüchiso bushiba mapa nung iba ama shisatsü aser tangatetba nungji takoksa aser lendong keta lir. Asenoki asen tetsü tasolima asoshi inyak nungbo, alima rongsen aser temaba jenjang marishitsü aser tenükshia menükshitsü. Aji oda, yimten nüchiso bushiba ya tenüng agidang bushir ka kümadokra, Naga nungertem tamasayongi yimten temeten indang ya mejembiang tajungba süla ta sasatsüsa anogo ka ajurutsü ana nung lir. Joko, asenok Nagaland nung alirtema Naga yimten otsü jembia yimsüsür akümba ya temoatsü masü saka lendong menar amato bilemdi, kechiyong Naga yimten nüchiso onük jembia election agili, Naga nunger yimten nüchiso telok teimba kümli ta asüba ya, jungjunga bilemdangra, Naga nunger rongnung telok telok aika küma lemsar azü tokshia raratsü renemtepba sentong ka dang asütsü. Naga yimten nüchiso bushirtem rongnung telok balala tali tali küma aoba ya, India dak Naga yimten ken o jembiba nung temulung machiba agi masü saka asenok rungnung kati ka dak temulung malem aser temulung machiba agi telemsa tali tali adokba ajanga lir. Ibaji asenok o asenok na raratsü atema injang bomb yanglur amai lir. Ibaji asenok asoshi lendong tulu aketba mapa lir. Iba lendong nung jagi shinga mejenbutsü, anungji tonga marudang jet ta nokdanga adoktsüla. Joko, Naga nunger yimten nüchiso angutsü temeten maliba agi masü, saka Naga nunger yimten nüchiso bushir telok ter metsü küma moudaktsütsü mechi, ait nung ken o jembirtemi, tangsa tang, Naga yimten ken o ya India den , teti atema tatembang küma masüyonga, tanü tendak asen dak apet yimten jenjang ka nung lateta toktsütsüla. Iba jagi,Naga nunger alima tsüngdang nokdaker maksü angutsüba tia tamajung tuluka nungi kümzüktsü.