Naga yimten yakta latettsü !

Olulu asü shitakar memetet saka Naga yimten tebilemtsü ya tatem küma taküm 2015 kümsa latettsü ta jembiba angashir. Ano, karibo tang taruba hopta ana tsüngda August 15 tashi nungbosa latettsü amai bilemer. Item ajakji teimla dang lir. Atangji, tang August 15 tashi nungbo telatetba kati marutettsüa akok saka 2015 küm matemdangsa telatetba kati arutsü merangtsü ta India tenüng nung Naga nunger linük tenzükertem den jembir Wb.R.N.Ravi-i ashiba osangji majungbo masü. Iba amaji anogo aser mapang ka atazüka yur telatetba bushiba nungji tagitsü adoktsü. Naga yimten tebilemtsü otsü ya tejen, anungji ajaki meteta lir saka telatetba ka dangi arutsü kanga tebenja aser tasak, iba jagi mapang agir. Iba ama mapang ka nung Nagaland tatar senden nung Naga nunger lushi sendaktepa aliba tashibo ajak yimten yimsüsüba ka kübok alitsü asoshi akhidang kasa tatar senden nung latetba pangzüng ano ken tasen kümshia latetshiba tetezüji center sorkar dang Naga nunger yimten tebilemtsü lalettsü asoshi Naga nunger Assam, Arunchal aser Manipur nung aliba ajak Nagaland yimten kübok alushi ajakji aittsüla ta akanger. Atangji, Myanmar küboka Naga nunger lushi tuluka nung Naga kintem lir. Ajisüaka, Myanmar-jibo bendang lima asüba agi asenoki parnokjibo India kübok asenoki külemi alitsüsa meinyaktettsü. Ano, metensür Myanmar nung Naga kinten tajemrep tia nung yimten temetena kecha magütsüi lia aliba to tangbo parnok nema yimten tashi agüja lir aser Naga nunger chief minister tashi inyakdagi, anungji iba jagi parnok mulung süa lir. Anungji , parnokia asenok den alitsübaji memulungtsüa akok. Iba ama tensa tia ka nung Naga nungerbo Naga nunger ser nung Nagaland den medennüra mekangshitsüla ta bilemer. Iba amaji ashiko Arunachal, Assam aser  Manipur  nung alirtemia Nagaland nungbo mendennüatsü akok. Aji oda, tanübo alima kanga ilaa kümogo aser alima ajak ya yimtsüng ka amai dang kümadokogo, anungji yimten yimsüsüba ka küboksa maliyonga Naga nungertem ajak tangatettep nung alitsüsa lenmang kar teyutettsüa akok. Aji oda, India temzüng nung ajemdaker India lima telongjem kümzüka ayutsüsa inyaktsü nangzüker inyaker asünungji, Nagaland tatar senden nung tatartemibo Nagaland nem yimten nüchiso agüjang ta meshitettsü. Ajisüaka, parnoki Naga nunger lushi tangjema aliba tashibo Nagaland yimten ka kübok külemi alitsüsa inyakdaktsüner ta ashibaji parnok ajak taginüba lir ta angatettogo. Aji danga inyaktet nungbo Naga nunger asoshi takok tuluka süla.  Ajisüaka, tekalen shisema aliba amaji, Manipur nung alir Naga nungertemi parnokbo Nagaland nunga madentsü saka yimten jenjang balaka meshitsü ta bilema lira, iba temulungtetbaji menokdangtsüla aser jembidaktsütsüla. Kasaji Arunachal nung alir Naga nungertemi parnokbo Nagaland nung medeni tang amai dang linüra, kecha masü parnoki mulungba nung  parnokjia sademsadema alitsüla. Iba kasaji Myanmar nung alirtemia parnokji Myanmar nung alibasa tajungba lir ta shitetra, parnokjia parnoki mulungba ama lidaktsütsüla. Yimten nüchiso aser temeten yabo ozüng agi masü saka tangatetba agidang aor asünungji, Naga nunger ta asüba mechi nung nisung shingia shinga anema tashiyim mamshitsüla. Iba tangatetba nung Naga yimten latettsü asoshi jembirtemi jembira, atangji taküm 2015 kümsa telatetba arutsübaji tasak masütsü.