Naga yimtenren ken o atema NPF-i amaliteptsü: NPF

Kohima, Luroi/August 21 (TYO): Bodhbarnü Naga People’s Front (NPF)-i, Naga yimtenren ken o tesünep nung tajungtiba agi latettsü atema party-i akokba amalitepa yaritsü, ta metetdaktsü.
“NPF nungi teshimtet lenir telok kati tawa shimba state Angh Raj Bhavan nung tanü ajurua pa nem tenüngsang agütsüba den pelaa agizük. Party-isa Centre sorkari pa (Ravi) Angh shimba atema pelaba shisem, kechiyong pa ya Naga yimtenren teloktem den Naga yimten ken o jembiba nunga interlocutor lir aser pai Naga nunger junga angateta aliba den Naga yimtenren atema inyaka arur,” ta Press Bureau, Naga People’s Front, Central Headquarter, Kohima sangdong ajanga metetdaktsü:
NPF party-isa Angh dang pai ketdangsüa inyakba kübok tekaraba nung ajaki agizüktettsüsa Naga yimtenren ken o latettsü imlar, ta shiogo. Secretary General, KG Kenye leniba nung NPF lenirtemi, Ravi-i interlocutor aser Angh na repsema inyakba ajanga tang tejembidak yimtenren ken o nung timtem mesüra tetsükdaktsü madokdaktsütsüla, ajisüaka tekaraba nung yimtenren ken o latettsü atema inyaktsüla, ta metetdaktsü.
Parnokisa Angh dang, 1964 küm mezüngbuba cease fire agreement sign asü, yimtenren ken o latettsü atema regional NPF party MLA temi Assembly nungi anen; tanabuba cease fire agreement ji 1997 küm NSCN (IM) aser India sorkar na tsüngda agi, 1998 küm NPF party-i Naga nunger lokti tentettem dang, Centre-i Naga nunger ola angashitsü atema election nung shilem magitsü ayongzüka liasü, ta metetdaktsü.
Item onük nung ajemdaker NPF-i Angh dang, party atema tongtibangtiba onükji Naga yimtenren ken o ya lir, aser Naga nunger atema lenmang lapoktsütsü atema party-i renema lir, ta metetdaktsüogo.
Angh-isa Northeast nung regional party tejentiba den senden amenba atema pelaba lemsatepba den külemi Naga nunger taginüba ataloktsütsü atema akokba tashi nungita yaritsü ta shiogo, ta kasa sangdong ajanga metetdaktsü.