Naga yimtenren ken o nung telok ajaki shilem agitsüla: Naga kin 14

Dimapur, Mongputeni/Oct. 22 (TYO): Naga Political Groups (NPGs) tsüngta tezüngzüktep agiba atema Nagaland nung aliba kin 14 Hoho (14 Tribal Hohos) ajanga pela agizüker, ta parnoki sangdong ka ajanga ashi.

Naga nunger küm 70 dak tema timtema aruogo aser iba timtemba mapang nisung meyirijang aika takum samaogo, aika tepuokdak yuogo aser Naga nunger yimtsüng ajunga amai mitsü kuma rongdoktsü, saka Naga nunger teimla mesama, Nagaland puti otsü nung anogo tasen ka tenzüktsü teimla lir, ta ashi.

State balala nung prokshia aliba Naga nungertemi yimjung nung yimten ken o angateteptsü nüngdak, ta angatetogo. Küm aika merangba sülen, NSCN (IM) ajanga animesoba aser iba sülen 7 NNPGs temi Government of India den yimjung ken o jembiba nung Naga yimten tebilemtsü tekeratiba nung tatem kati arutsü atema terenlok aliba angur, ta sangdong ajanga ashi.

Naga Tribal Hohos, civil society ajak aser Government of Nagaland ajanga telok ajak dang yimjung nung yimten ken o angatetteptsü atema jembitena aru.

Taoba Interlocutor R.N. Ravi-i ashiba ama, integration aser nüjiso atema meimlatsüla, saka tezüngzüktem nung Manipur, Arunachal aser Assam nung aliba Naga nunger ajunga ayimjemtsü.

Ken o jembirtem tsüngta aisü nung tangatetba balala alitsü akok, saka itemji ajanga Government of India den tekeratiba nung yimtenren tangatetep kati arutsü atema jembiba nung tetsükdaktsü malitsüla, ta ashi.

Yimjung nung yimtenren ken o tangatetep kati tekeratiba nung marutetra, Naga nunger lanurtem aser lanu putu tarutsü tia majungtsü.

Tang tensa nung ajaki telungjem atema ola adoker, anungji telok balala tsüngta telemsa tali madokdaktsütsüla, aser kin 14-i telok balala tsüngta telemsa adokba memelatsü aser telok tasen kar danga adokra ozü litsü nung inyaksangshi mesüdaktsütsü, ta sangdong ajanga ashi.

Government of Nagaland indang party ajungai tang inyakba nung ajemdaker NPGs ajak ken o jembishinüdak adentsüla, kechiaser parnokia tekeratiba nung yimtenren tangatetep kati arutsü atema lenmang lapokja ajak lungjemogo, koba Naga Civil society ajungai aginüba ama lir, ta kin 14 Hoho sangdong ajanga ashi.