Naga yimtenren latettsü atema inyaktsü: NNPGs

Dimapur, Aenjeti 28 (TYO): India sorkar aser Naga yimtenren teloktem tsüngda ken o tejembidak mapang ka nung, ken o jembir teloktemi Naga nunger atema tagizüktettüsa yimtenren onük latettsü asoshi inyaktsü, ta tanü NSCN-IM Kilo Kilonser, Hukabi Yepthomi aser NNPG Working Committee züngsem, Alezo V Nuh nati külem sangdong ka ajanga metetdaktsü.
“State nung National aser Regional naprongla nungi yimtenren party ajaki “Solution, Not Election” atema telangzüba tajung agutsüba atema onoki pelar. Tang ama Naga nunger atema tetendangba mapang ka nung asen nüburtemi tashi itta nungitba atema ken o jembirtem kanga pelar. Onokisa tribal Hohos ajak aser lokti tentettemi telongjem atema inyakba asoshi pelar,” ta sangdong nung shia lir.
“Naga nunger ajaki election nung shilem magitsü atema longjemer lemtetba mapang ka nung, shingaia pei ajangzüktsü atema election nung tokteptsü atema tenüng agüja aser election nung shilem agiba ajanga puti mapang nungi ken o jembia aruba nung teraksa bener marutsütsü tekümdangtsü metetdaktsür. Core Commitee of Nagaland Tribal Hohos and Civil Organizations-i ayongzüka Aenjeti (January) 28, 2018 nü Hotel Saramati, Dimapur nung külem senden amenba sülen onoki (Working Committee, NNPG aser NSCN-IM)-i külem sangdong ajanga iba osang ya sangdonger,” ta kasa sangdong nungsa shia lir.