Naga yimtenren onük latettsü atema NLF-i maneni inyaktsü: Sazo

Kohima, November 03 (TYO): Nagaland Legislative Assembly Speaker, Chotisuh Sazo-i, May 25, 2015 nü Nagaland Legislative Forum (NLF) tentetba mapang nungi Forum-i Naga yimtenren ken o nung  lenmang lapoktsür ka ama shilem agia arur, ta metetdaktsü.
Paisa, iba Forum-i Ato kilonser, Narendra Modi, Interlocutor R N Ravi, Union Home Minister Rajnath Singh, Minister of State for Home, Kiren Rijiju aser Centre nung lenirtem ajurua 1929 küm nungi tanü tashi indang Naga ken o metetdaktsüogo, ta ashi.
Pai ashiba agi, iba Forum-i Ato kilonser dang Naga yimtenren telok ajak densema India-Naga tebilemtsü ken o latettsü aser NSCN(K) den ceasefire yanglushitsü mepishiba den külemi Disturbed Area Act and Armed Forces Special Powers Act agientsü atema mepishiogo.
Paisa, NLA nung MLA 60-i NSCN(IM) aser Naga yimtenren telok trok den senden menogo iba den külemi NLF-i Khaplang ajurua pa dang India sorkar den ceasefire tezüngzüktep agitsü mepishitsü atema Naga Hoho aser ENPO nungi teshimtet telok Myanmar-i yok, ta metetdaktsü.
Bodhbarnü Chozuba Town state nung  29buba Town Council tenzüktsüba sentong nung jembidang pai item o metetdaktsü. Chief Minister TR Zeliang-i Chozuba Town Council tenzükja liasü.
Terenlok tsütsü Sazo-i, nüburtemi sorkar dak dang meimlatsüla saka peipei jila aser municipal tajungba akumtsü aser terenlok alitsü atema meranga inyaktsüla, ta ayongzük.
“Asen jila tajungba akumtsü aser terenlok alitsü atema asenoki jembir saka meinyaker,” ta Sazo-i ashi.
Chouzuba Town Council akumtsü atema melaba asoshi pai Chief Minister T R Zeliang, Cabinet züngsemtem aser Municipal Affairs Parliamentary Secretary R Tohanba nunger dang pelaba lemsatep.
Sazo-isa, Chozuba ya jila tejentem rongnung ka lir, anungji Chozuba Assembly Constituency nüburtemi sorkar nungita dang lira jila nung terenlok maneni alitsü, kechiyong Chief Minister Zeliang aser NPF Tir, Dr. Shürhozelie na lenisüba kübok NPF-i aniba DAN sorkar maneni tashii arutsü. “Anungji asenoki parnok teka tashi itdaktsüdi,” ta ayongzük.
Iba sentong nung Chief Minister densema aliba maongka agia Chozuba nüburtemia jila nung Government College ka amenoktsü, GHSS building tasen yanglutsü, Chozuba Local Ground nung kilem atongtsü aser Rest House ka yanglutsü atema temepishiba agütsüogo.