Nagaland adena orr azüngertem atema scheme ka tenzüktsür

Kohima, October 30 (TYO): Nagaland state sorkari Nagaland Ex-gratia Scheme for Students Studying outside Nagaland (NGESSO) ta ser scheme tasen ka tenzüktsüogo.
Iba scheme ya Nagaland state nung recognised scheduled tribes aser indigenous inhabitants nungi kaketshirtem atema dang lir.
Bodbarnü Directorate of Higher Education nung Higher & Technical Education and Tribal Affairs Minister Temjen Imna Along-i iba scheme tenzüktsü.
NGESSO ya state adena orr saka India kübok aliba rejutem nung primary level nungi post doctoral courses tashi azüngertem asoshi lir. Iba scheme kübok secular, technical, professional, diploma aser theology course azünger kaketshirtem dena lir.
OSD Finance Department, Taliremba-i iba scheme indang osang lemsaptepdang “Nagaland adena orr kaketshirtemi asü-ama tia ajurudang sorkari senotsü teyari agütsütsü atema iba scheme tenzüker” ta ashi.
Finance Department-i fixed deposit nung sen crore 5 Corpus Fund ama ayutsü aser iba nungi tetemlok anguba nungi tasür kinunger nem sen lakh 5 agütsütsü. Iba inyakyim ya Direct Benefit Transfer (DBT) ajanga agütsütsü, ta Taliremba-isa ashi.
AHoD/Secretary to the government of Nagaland, department of Higher & Technical education nungi temelaba anguba sülen ita ka tsüngda DBT ajanga sen agütsütsü, ta paisa metetdaktsü.
“Tanü ya state atema otsüsütsü anogo ka lir aser chief minister, Neiphiu Rio-i kaketshirtem atema kanga bilemtsüba ajanga iba scheme asangsang nung tenzüker” ta Minister Along-i o jembidang ashi.
Nagaland nung sorkar yimsü süa arurtemi kaketshirtem atema iba ama mapa ya kodanga meinyaktsüdang. Iba ya Chief Minister-i anir sorkari inyaktetba mapa tajung ka lir. Mapa tasen ka tenzükdang timtem aser tetsükdaktsü kar ajurutsü akok saka kaketshirtemi amalitepa yariteptsü mepishir, ta paisa ashi.
Iba mapa ya tashishitsü kecha melii, kin melemsai aser shinga mebendangi inyaktsü, ta Minister-isa shisem.
Nagaland adena orr alirtemi asen state indang menden agiba indang olen ka jembidang “Iba scheme ya Nagaland nungi Naga kaketshirtem ajangzüktsü atema dang lir” ta Imna Along-isa metetdaktsü.
Sangküm nungi department-i yimti tulu 5-6 ka nung resident commissioners nem senotsü terara agüja yura, kaketshirtemi mapang shitak nung teyari angutsü akok. Kechiyong bendanglen kaketshirtemi timtem kanga ajurur, ta paisa ashi.
PDA sorkari küm ka, ita tenet ser anogo 7 yimsü süa arudang Nagaland nung nung temelenshi aser terenlok bener arutsü atema akokba tashi meranga inyaka arur. Iba nung nübrtemi sorkar dak tamang ayutsü aser temulung alemtsü nüngdaker. Talisa sorkar mapa nung kaketshirtemi amalitepa inyaktsüla, ta Minister Along-isa ayongzük.
“Iba scheme nung tim masüba kecha melii ochishia inyaktsü ta ni nangzüker” ta paisa ashi.
Iba dak sendakba osang tali jangjatsü atema kaketshirtemi department indang website www.highereducation.nagaland.gov.in reprangtsü akok.