Nagaland ajunga ita 6 atema ”disturbed area’ ta sangdonger

New Delhi, July 1 (Agencies): Nagaland ajunga taruba ita trok (December tashi) atema “disturbed area” ta züngoktsü atema Centre sorkari osang metetdaktsüogo.
Nagaland nung küm aika Armed Forces (Special Powers) Act (AFSPA) ozüng agüja arur aser iba kübok maneni “disturbed area” ta züngshitsü.
Centre sorkari Nagaland state ajunga ya tensa majung aser lendong ataloktsü ana nung lir aser iba jagi armed forces-i civil power den yariteptsüba kanga nüngdak ta bilemer, ta Ministry of Home Affairs (MHA)-i tanü sangdong ka nung metetdaktsü.
Armed Forces (Special Powers) Act, 1958 nung Arrla 3 nung tashi agüja aliba nung ajemdaker Centre sorkari June 30, 2019 nungi tenzüker taruba ita trok tashi Nagaland ajungalen ‘disturbed area’ ta züngshitsü metetdaktsür, ta MHA-isa ashi.
Nagaland kübok tesem aika nung nisung tepsetba, auyaba aser tashiyim agi sen saruba inyakyim manener aser iba jagi security forces-i mapa inyaktsüsa akümer, ta MHA ketdangser kati ashi.
Northeast aser Jammu and Kashmir nungi telok aikati ashishitep aketba Armed Forces (Special Powers) Act agientsü atema takhangba agüja arur.
AFSPA ya Nagaland nung küm aika benshia arur. August 3, 2015 nü NSCN-IM general secretary Thuingaleng Muivah aser government interlocutor RN Ravi nati Prime Minister Narendra Modi lia framework agreement nung sign asüba sülen-a iba ozüng magien.
1997 küm NSCN-IM aser India sorkar tsüngda ceasefire alitsü nangzüktepba sülen küm 18 tashi olemtepa aruba sülen framework agreement agia liasü.