Nagaland ajungalen takok ngua mokdangogo

Hombarnü Nagaland Bandh alidang Dimapur aser Mokokchung tiyongtsü nung yimdong azüngazünga aliba noksa nung angur. (Kohima, February 11)

Kohima/Dimapur/Mokokchung, February 11 (TYO): Naga civil society teloktemi Citizenship (Amendment) Bill, 2016 anema aser Naga yimten latettsü takhangba agüja tanü state ajunga mokdang.
“Ajak tiptema süiogo” ta Additional Director General (Law & Order), Rechamo P Kikon-i ashi.
Iba mokdang ya Nagaland Gaon Burhas Federation (NGBF)-i ayongzük aser civil society teloktem, kin hohotem aser sensotem külemi longjemer tentetba Joint Coordination Committee (JCC) kati ketdangsüa reprang.
February 6, 2019 nü Dimapur nü senden ka amendang Nagaland Bandh asütsü telemtetba agi.
Temulungertemi shilem agiang ta dang shia tanü mokdangba sentong ayongzüka agi. Iba amaji volunteer shinga mapa melemzüktsü aser GBs o Dobashis-i tensa osang angalaa senzü.
Tanep 6:00 ako nungi nikongtsütsü 4:00 ako tashi mokdangdang school aser shishilembadak ajak shibang aser garitema mesenzü.
Nagaland nung opposition telok Naga Peoples Front (NPF)-ia iba mokdang posema nungit.
Nagaland Cabinet-ia Citizenship (Amendment) Bill magizüker ta lemtetogo. Ajisüaka, Lok Sabha MP Tokheho Yepthomi-i iba bill agizükdang ola madokba atema Naga civil society temi PDA sorkar dak tamang makar.
Tanü mokdangba sentongji CAB 2016 anema dang masü saka Centre-i küm 70 tema Naga yimten tebilemtsü süoki mebilemba atema tejashi sayua ayongzüka agiba liasü.
Nagaland Chief Secretary and Finance Commissioner Temjen Toy-i ashiba agi, “February 21 nü agitsü aliba Budget session nung state sorkari Bill anema bangzüng ka renemtsü. Iba ya January 31 nü Dimapur nung senden amendang lemtetba ama inyaktsü.”
Külen, Chief Minister Neiphiu Rio-ia ashiba agi, state sorkar ya nübortem tebilemba aser taginüba atema lir aser Bangladesh, Pakistan o Afghanistan nungi telok tilaba 6 nem India senso agütsütsü merangba Bill anema noktaker.
“Ozü sorkari nübortem indang temetenten aser maongkatem kümzüka ayutsü” ta Rio-isa nangzükogo.
India sorkari Citizenship Amendment Bill (CAB) ozüng küma yanglutsü merangba anema aser Naga yimden tebilemtsü dak sentakba nung telemtetba magiba atema tejashi sayua Nagaland nung aliba Civil Organizations, Tribal bodies aser Indigenous Citizens indang Joint Coordination Committee-i Feb 11 nü ghonda ter “Nagaland Bandh” ayongba sentong Mokokchung district nunga timtem kecha mataloki yimjung aser tesünep nung takok ngua liogo.
Mokokchung district nung iba sentong ya Mokokchung District GBs Association-i yakbang sür ayong aser parnok den mulungtet telok balalai shilem agia nungita liasü. Iba mokdang sentong ya Mokokchung yimtiba nung dang masü saka Changtongya, Tuli aser Mangkolemba sub-division-tem nunga takok ngua agiba osang ajanga angazüker.
Ghonda ter (anepdang 6:00 nungi nikong 4:00 ako tashi) mokdangba mapang nüburtemia akhümtsübu agüja office, dokan, kaketrijutem melapoki aser gari olioraba kecha melii tesüngjem nung agiogo.
Iba mokdang sentong nung mulungtet telok shirnokisa yaritepogo, parnok ajak dang pelaba den ano nüburtemi tangatetba tajung nung shilem agia amalitepba asoshi Mokokchung District GBs’ Association, Tir Wb. Imolemba aser Tongti Zülur Wb. Along Jamir nati pelaba olen ka osangbenertem den jembidang lemsatep.