Nagaland: Alia Bhatt-i Naga student tem den sensak asem

Dimapur, November 25 (Agencies) : Jio indang sensaksem sentong ka akaba mapang Alia Bhatt-i Nagaland nung aliba kaketshirtem dang lai memunui Northeast India semdangtsü atema sentong yanglutsü, ta ashi.
Par brand-i Digital Life agütsütsü nangzükba ama, Jio-i tangar ajungmesotsü aser jangradaktsütsü sempet keta aliba nübu tajung kar yoka India tesem ajaklen college azüngertem den sensaksem sentong ayonga akar. November 24, 2016 nü Pranabananda Women’s College Dimapur nunga nübur ajaki meteta alila, actress Alia Bhatt-i kaketshirtem den sensaksem sentong ka agia liasü.
North East tesemtem nung aliba nüburtem den chitepa oa ajurutepa sensaksem sentong akaba ajanga company tenangzükba digital temelenshi, item tesem nung bener arutsü tenzükogo, ta Jio official sangdong ka ajanga metetdaktsü.
Alia Bhatt ajanga India nung aliba institution balala 40 tashi Mumbai Headquarter ser aliba Jio den sendaktepa kümogo.
Kaketshirtem den sensaksem akaba mapang Alia-i lai ajangshibatem lemsatepa parnok ajungmeso. Lai la taküm asoshi meranga inyakba aser temulung ulua telemtetba shitak agiba ajanga taküm nung takok anguba dena ashi.
Pranabananda Women’s College Dimapur-i asüngdangba ana Alia-i shimteta langzü. College nungi Mezhuvi Seyie-i Alia Bhatt den sensak asemba mapang item tasüngdangbatem asüngdanga liasü.
Alia Bhatt-i kaketshirtem den sensaksem sentong akaba atema kanga pela aser kaketshirtem indang uniform pink sentsü kanga junger ta ashi.
Lai, North East ya kanga tobur tajung, ta shisem.
Actress Alia Bhatt-i tan tasen sayaba film ‘Dear Zindagi’ nung tongti shilem agia lir. Iba film ya English Vinglish film direct asüsang Gauri Shinde-i direct asü.
Lai Dear Zindagi movie indang otsü jembi aser iba film ajanga la taküm nung tazüokba ka aruogo ta kaketshirtem dang ashi.