Nagaland ana kümra koda ?

Ajungbenaka Nagaland nung tang dang nungi tensa tamajungka mekümdaktsütsüba tenüng nung center government-i sepai talila aika yokra, tawa Jammu & Kashmir nung atalokba mesüka Nagaland nunga yimten nung tatalokba tasen ka yakta ataloktsü ta asenoki bilemtsüla. India yimten nüchiso ngur külen, India lima tuluba küma longjemshitsü asoshi Jammu & Kashmir chuba den tangatettep ken o ka renemba ajanga India telongjem nungsa süaka,  Jammu & Kashmir yabo yimten jenjang balaka nung, parnok wako balaka aser temzünga balaka ta ser aruba, manger sangwa nung item temeten ajakji agienba dang masü saka Jammu & Kashmir state agi yimten ana küma lemdangtsüogo. Atangji, Nagaland state yabo India telongjem kübok alitsü asoshi India government den yimten tangatettep ken o balaka renema liaka, Jammu & Kashmir jenjang dang nungibo tilaba ka nung arur. Ajisüaka, Naga nunger yimten temeten aser taginübajibo Jammu & Kashmir nungertem dang nungi temaba aser tuluba lir, kechiyong Naga nunger temeten aser taginübajibo yimten nüchiso jenjang ka nung Naga nunger lushi ajak Naga yimten kübok longjema alitsüba temeten aser teyongyaba liasü. Ajisüaka, küm paikaya Naga nunger o India nunger na tsüngda Naga yimten ken o latettsü asoshi ken o lemtepa aruba ya mezüngshii, Jammu & Kashmir ama Nagaland-a ana küma lemdangtsü nunga koma süla (?) ta taoba hopta nung asenoki iba osangkaket ajanga bilemdangogo. Atangji, Naga nungerbo Naga nunger saka alushi ana asem küma lemdanger tangar bendanger yimten kübok state balala ser alitsübaji Naga nunger asoshi maksü aser tamakok tuluka asütsü. Ajisüaka, tang Naga nunger linük tenzükertem aser tema nung tenteta aliba lokti tentettem meputeptetba tia ya reprangdangra, jepaka nüktzü malu, tejashitsüka aser tesasatsüka lir. Aji oda, Naga nunger yimten ka kübok külemi longjema alitsü jembia-jembia, tang aliba Nagaland agiang ana küma lemdangtsüsa, tangari melemdangtsü dang yongi asenoki asenoksasa jembiadokogo. Atangji, Naga nungersa asüyonga meputepi alitsü agibo aser yimten nüchiso jenjang angutsüsa temeten liaka, iba jenjangji angutsüsa Naga nunger melongjemtettsüsa kümra, Nagaland agi ana küma lemdanger putepa alibajiang tarutsü Naga nungertem asoshibo tajungba asütsü. Iba tangatetba nung Nagaland agi state ana akümtsübajiang tang tang atemabo tajungba asütsü ta ajaki angatet nung junger. Atangji, tang aliba Nagaland agi ana asem kümaka yangji alirtemji Naga nungerbo Naga nunger asütsü, anungji Naga nunger lokti ajak longjema alitsü asoshi loktiliba aser sobaliba sabang kabo nüngdaktsü, anungji iba ama sabang kaji bushitsüba dak alaka Naga nung lushi ajak yimten ka kübok longjema alitsübo tangsa tangbo tamakoktsü amaika kümogo. Ibayongji, Naga nunger linük tenzüker teloktemia India government den, joko, yimten nüchiso asoshia masü aser Naga nunger lushi yimten ka kübok bener aittsü asoshia masü saka Naga nunger wako aser Naga nunger temzüng balaka amshitsüsa temeten alitsü atema jembir südi. Naga nungertem yimten nung tejak meyitsü atema India government-i iba taginüba anaji danga agütsüra, Naga nunger tanü tia apibo tuluka asütsü. Atangji, Nagaland state agi ana akümyonga makümyonga aser Naga nunger nem wako aser temzüng balaka amshitsü temeten agütsüyonga magütsüyonga, Naga nunger ajak atema tongtibangtiba nüngdakjibo telongjem aser teputep lir. Naga nungerbo iba anajiang arishitsüla.