Nagaland Angh Acharya-i Dream Dragon fruit farm semdang

Dimapur, Rongjui/Sept 08 (TYO): Dimapur kanga tatsük süaka Rongjui/September 7, 2018 nü Nagaland Angh, P.B.Acharya-i Dimapur yimti nungi kilometer 20 shi pilar aliba Shitovi yimdak Dream Dragon fruit farm semdangogo, ta tanü ketdangsertem osang ka ajanga metetdaktsü.
Pai iba farm semdangba nükjidong ya agricultural entrepreneur, Lucy Ngullie Thomas ajungmesotsü aser la dang pelaba lemsateptsü tebilemba nung semdangogo.
Iba farm junga anepaluba agi kanga melungsüa Angh, P.B. Acharya-i Lucy dang la indang farm noksa den dragon süngjang ajanga temang nung teyari balala agutsüba indang tezüluba nung Ato kilonser nem agutsütsü aser Raj Bhavan, Kohima dangia ka yoktsü asüngdang.
Acharya-i ghonda ka dak tali Dream dragon fruit farm semdangba mapang pai ornamental pineapples, Gac fruits, exotic guavas, Rambutan, Avocado, Fig, Longan, Mangosteen, Durian aser Soursop den White, Red, Yellow ad Orange fleshed dragon fruits repranga senzü.
Pai Lucy Ngullie Thomas dang lai mapa ajung inyakdar ta shia la nem tenüngsang agutsü.
Anghisa pai internet nung iba süngjang indang reprangdang aser iba süngjang ajanga temang nung tajangzük balala agutsüba ajanga süngmanger, ta ashi.
Angh den DHO, Temsu, DPRO, Lolano Patton, EAC, Wiridin, police ketdangsertem aser pa indang ADC den OSD densema liasü.