Nagaland Angh, Acharya-i Rajya Puraskar Award agütsü

Kohima, June 25, 2019: Mongolbarnü State Heaquarters Kohima nung state Angh, P.B. Acharya-i guide ka nem Rajya Puraskar award agütsüba noksa nung angur.

Kohima, Aami/June 25 (TYO): Nagaland State Bharat Scouts & Guides (NSBSG)-i ayongzüka June 25, 2019 nü Conference hall, Life Members’ Building State Headquarters, Kohima nung Nagaland Angh, P.B. Acharya dang pelaba sentong ka den külemi Rajya Puraskar Scouts & Guides 2019 awards agütsüba sentong ka repsema agiogo, ta ketdangsertem osang ka ajanga metetdaktsü.
Iba sentong nung jembidang Angh, Acharya-i, nisung ka tajungba küma lokti nem tajung meyipa agütsütettsüsa shisaliok-i nisung ka nem tashi agütsür, ta ashi.
Shisaliok ya degree ka anguba aser sen tali aazükba indang ang masü, saka lokti tenzüktsü atema nükjidong ayutsüla, ta pai ashi.
Acharya-i, kanga meranga inyakaka tia makai schools aser kaketshir aika scouts & guide movement nung züngsem maküm, ta ashi. Iba dak sendakba nung pai, school ajak nung, talisa sorkar school tem nung scout & guides movement tenzüktsü atema tashimait bushiteta inyaktsüla, ta ashi.
Paisa kaketshirtem dang, lokti tenzüktsü nükjidong nung scouts & guides movement nung adentsü ayongzük.
Kibong, kin aser linük tashi itdaktsütsüji ajak teinyaktsü mapa lir, ta pai ashi.
Kasa sentong nung jembidang Youth Resources & Sports Advisor aser President NSBSG, Er. Zale Neikha-i Rajya Puraskar award angurtem nem tenüngsang agütsüba den külemi linük nung tematiba award- President’s award arshitsü ayongzük.
Paisa, Bharat scouts & guide ya lanurtem atema voluntary, yimtenren madenba aser educational movement ka lir, aser iba ya ajak nem lapokja dang lir, ta ashi.
Zale-isa Angh-i tzü rizüngba, solar energy construction of vermin compose pits aser e-governance densema nüburtem atema mapatong aika achaayanga inyaktsüba atema pa dang pelaba lemsatep.
Kohima aser Dimapur district na nungi scout 21 aser guides 17 nem Rajya Puraskar scouts & guides 2019 award agütsü. Taküm Governor’s award agizüktsüsa adokdaktsür units nem Citation aser senpet agütsüogo.