Nagaland Angh aser CM-i Gandhi Jayanti salem osang lemsatep

Dimapur, October 01 (TYO): Nagaland Angh, P.B. Acharya-i state nüburtem dang Gandhi Jayanti salem lemsateper, ta tanü PRO to Governor sangdong ka ajanga metetdaktsü.
Iba anogomong ajanga nübur ajak Gandhi indang ochi lenmang, meraraba aser merükmejuba lenmangi anitsü imlar, ta Angh-i metetdaktsü.
Iba anogomong ajangsa alima nung yimjung, alima nung telongjem, chihiba temeim aser merükmejuba lenmangi anitsü imlar, ta Angh-isa metetdaktsü.
“Mahatma Gandhi-i linük nüjiso aser tamangba lokti tsüngda tesünep atema pa akumli piyong nendaka inyak. Pa tangatetbatemji alimai benshir aser teti alitsü. Yimjung alitsü atema pai ‘Ahimsa’ nung tamang akabaji mapang talangka alitsü. Paisa merükmejutsü aser yimya tajung benshitsü atema tesayuba agütsü,” ta sangdong nungsa shia lir.
“Iba anogomong nung asenoki Gandhi tangatetbatem maneni bilemtetdi, aser India tasen ka atema ‘Swachh Bharat’ atema inyakdi,” ta Angh-isa ayongzük.
Ano tanga sangdong ka nung state Chief Minister-i Gandhi Jayanti salem lemsatep.
“Tsükchirtem densema tamangba lokti ajak ajungtsü atema bendanga inyaksang, linük tebuti, Mohandas Karamchand Gandhi asoba anogo- Gandhi Jayanti anogomong nung linük den liromedema Nagaland-a densema amonger,” ta Chief Minister-i lemsatep, ta tanü CMO Media Cell sangdong ka nung metetdaktsü.
“Pa tangatetbatem ajanga alima ajak ajungshir. Takotet leniri meraraba, tasütait aser ochi tangatetba nung nokdak aser British nunger kübok alar tia nungi nüjiso angutsü atema tongtibang shilem agi,” ta CM-isa ashi.
“Tesünep nung aliba Naga nunger densema pai tamangba yimsü balala nungi nübur ajak akhümtsübu,” ta paisa ashi.
“Gandhi Jayanti ya alimai ‘International Day of Non-Violence’ amongba anogo ka lir. Asenoki pa tangatetbatem- tesünep, linük meimba, bendanga agütsüba aser meraraba tangatetbatem benshiba ajanga iba anogomong tetezü ketdaktsüdi,” ta CM, TR Zeliang-isa ayongzük.