Nagaland Angh-i Assam Rifles pusema nungiter

Guwahati, November 22 (Agencies): Assam Rifles-i taküm October ita Nagaland nung osangkakettem nem tetuyuba agütsüba pusema nungiter, ta Nagaland Angh P B Acharya-i ashi.
Acharya ya Assam nunga Angh mapa repsema inyaker aser Deobarnü Guwahati nung osangbener den jembidang pai Assam Rifles pusema jembi.
“Assam Rifles-i ozüng nung aliba ama inyakogo. Sorkari noktanga aliba telok ka indang osangtem asenok osangkakettem nung madoktsü. Telungpur teloktemji sorkar den yimjung tenangzüktep agia lira, parnok indang osangtem osangkakettem nung adoktsü” ta Acharya-i ashi.
October 25 nü Assam Rifles-i osangkakettem dang NSCN-K nungi aruba sangdongtem adokba ajanga osangkakettemi ozüng noktanga aliba NSCN-K telok pusemba sayur ta metetdaktsü.
Assam Rifles-isa yimozülurtem Unlawful Activities (Prevention) Act, 1967 alema inyaker ta aitsü.
Tanü Acharya-ia ashiba agi, NSCN-K ji sorkari noktanga aliba telok ka lir aser iba jagi Assam Rifles-i tetuyuba agütsü.
Assam Rifles-i tetuyuba agütsüba sülen National Press Day nü Nagaland nung English oshi nung adokba osangkaket asemi lungkak aitba sayua yimozüluba tapak tazüngla adok.
Iba tetuyuba ya press temeten amokbangtsü merangba lir ta yimozülur aikati metetdaktsüogo aser parnoki sadang-sari melii osangtsüsang adoktsü ta shiogo.
Acharya-isa ashiba agi, Northeast nung telungpur telok tulutiba NSCN (IM)-i Centre den peace framework ayuba ajanga northeast nung yimjung teimla shia arudaktsüogo.
“Nagaland nung yimjung arura, iba jagi Northeast ajungalen yimjung arutsü teimla bener arutsür. NSCN (IM) den peace framework ajanga teimla shia arudaktsüogo. Ano, Myanmar nung loktiyimten maparen tashi aitba ajanga northeast nung tajangzük angutsü” ta paisa metetdaktsü.