Nagaland Angh-i Dimapur nung Organic Market semdang

Rongjui/September 07, 2018 nü Nagaland Angh, PB Acharya-i Dimapur nung Nagarjan traffic Point anasa aliba Supermarket nung tawa semzükba Organic Daily Market semdangba mapang tangokba noksa nung angur. Dimapur, Rongjui/September 07, 2018. 

Dimapur, Rongjui/September 07 (TYO): Tanü Nagaland Angh, PB Acharya-i Dimapur nung Nagarjan traffic Point anasa aliba Supermarket nung tawa semzükba Organic Daily Market semdangogo, ta ketdangsertem osang ka ajanga metetdaktsü.
Organic Daily Market nung Farmer Producer Organisation (FPO) aser Development authority of Nagaland (DAN) ketdangsertem den jembidang Angh-i, FPO-i achaayanga item ama nüngdaka aliba market lapokba atema pelaba metetdaktsü.
Marketing shed ya DAN meyong lir aser iba paraji ita nung sen 10,000 lir ta angazükba nung ajemdaker Acharya-i Development Authority of Nagaland dang iba market junga mamenok tashi mesüra tajemba agi küm kabosaa ita nung sen 100 dang agitsü mepishishia, ibaji ajanga sensakertem taküm ajungkettsütsü, ta ashi.
Anghisa aluyimertemi züsentetbatem market-i bener aotsü atema pick up truck ka alitsü atema sen lakh 2 tenla agutsü. Market aser temeket merükmeju alitsüla, ta shia Acharya-i anogo shia market nung amshitsü atema aoso, spoons aser marok agutsütsü, ibaji ajanga disposal auso aser marok agi tesem memenentsü, ta ashi.
Anghisa shishilembartem dang customer tem atema sü agi yangkhu yanglua jenjang dalang agi ayoktsü aser plastic bags mamshitsü ajungshi.
Pai FPO dang shishilembar ajak atema menden junga yanglutsütsü aser aonsotsü ayutsü atema sadem ajungketa yanglutsütsü mepishi.
Angh-i stalls ajak semdang aser ajak nungjagi langkabosa aliba den shishir ka dang nungibo süng agi yangluba auso 100 mangaa liasü, aser ibaji pai market atema tenlaba nung amshitsü.
Organic daily market semdangba sülen Angh-i CM’s relief fund dak sendakba nung Durga Mandir nung Naga nunger masüba melungtet telok balala den senden amen, aser iba senden nung pai parnok dang tawa tzümetsüng aser anentsüh agi takoksa angurtem yaritsü atema melungsoa tenla agutsütsü mepishia liasü.
Ajioda senden nung adenba tentet balalai senotsü bushia tenla agutsütsü nangzükogo.