Nagaland Angh-i Durga Puja salem metetdaktsür

Dimapur, October 7 (TYO) : Nagaland Angh PB Acharya aser pa kinungtsü Kavita Acharya nati Durga Puja aser Dussehra benjung salem metetdaktsü.
Durga ya alima rangben tsüngrem lir aser la dak temeim, rongsen, tashi, tobur aser yimya tajungtem ajak dena lir. Durga Puja ya Hindu nunger atema tamangba benjung ka dang masü saka iba longjemshiba aser tasen adokdaktsüba mapang ka lir, ta Raj Bhavan sangdong ka nung metetdaktsü.
Hindu tsüngrem Rama-i mojing chuba Ravana madak takok anguba nüngtem nung Dussehra benjung amunger. Ramayana otsü nung Lord Rama-i pa kinungtsü asütsü atema Sita angur saka Lanka chuba Ravana-i la pur aoer. Ramayana nung Ravana ajanga tongti shilem agir aser Lord Ram-i anogo 10 nü Ravana tepseter aser iba jagi Dussehra amunger. Dussehra benjung dang Durga Puja ta-a ajar aser nisungtemi anogo 9 nü tashi Goddess Durga külemer aser iba sülen Mahisasura tepsetba atema Dussehra amunger, ta sangdong nungsa shia lir.
Durga Puja aser Dussehra benjungtem yimjung, tepela aser telongtem tangatetba nung amungtsü moatsür, ta PRO Raj Bhavan sangdong nungsa metetdaktsü.