Nagaland Angh-i Education Department nung bushisüngdangtsü tuyur

Kohima, March 27 (TYO) : Nagaland Angh, P.B. Acharya-i State Education Department kübok mapa mejungi inyakba aser ochimashi ken o aika alibatem bushisüngdangtsü atema tetuyuba agütsüogo.
Par sorkari ochimashi ken o ka danga metoktsütsü aser ozüngi melaba ama aibelenertem merenshitsü ta PB Acharya-i jangjangja metetdaktsür, ta tanü Raj Bhavan sangdong ka nung shia lir.
“Tim mesüi inyakba ajanga Mid-Day meal okronger” ta osangkakettem nung züngshiba sülen Angh-i iba osang metetdaktsü, ta sangdong nungsa shia lir.
Angh-isa Education Department nung onük aika atema süoki ia bilemtsür aser itemji Hindi tesayurtem itasen, Peren district nung tesayurtem shimba aser mapa meinyakba, sen magütsüba atema contractor temi school ki shibangtsüba, meta talanglang pilar aliba yimtsüngtem nung Proxy tesayurtem inyakdaktsüba aser SSA Funds o Schemes tim mesüi amshiba tem lir, ta Raj Bhavan sangdong nungsa metetdaktsü.
Item onük jungjunga bushisüngdangtsü aser teinyaktsü tim inyaktsü atema Angh-isa tetuyuba agütsü. Iba dak sendakba nung Angh-i Chief Minister aser Education Minister dang tezüluba nung tekaratiba nung mapa inyaktsü shiogo, ta sangdong nungsa shia lir.