Nagaland Angh-i Naga nunger oshi ajungkettsüner

Kohima, Oct. 05 (TYO): Nagaland nung Naga nunger kin balalai jembiba oshi shia ya mesamadaktsüi renloka ajungkettsütsü asoshi Nagaland Angh, P.B.Acharya-i Central Institute of Indian Language, Mysuru nungi ketdangsertem jaoka Kohima nung shisalemsatepba sentong ka agiogo.
Central Institute of Indian Languages (CIIL), Mysuru ya Ministry of Human Resource Development, Government of India kübok inyaker aser parnoki Bharatavani Project ajanga Nagaland nung oshi tapu balala jembiba ya renlokdaktsütsü asoshi osep dena yangluja yarir. Joko, iba sentong ajanga Tenyidie oshibo online ajanga angazüktettsüsa taküm kümsa Nagaland University, Kohima Campus den longjemer tenzüktsü telemtetba agiogo.
CIIL nungi arurtem den ano Nagaland nung oshi tsütsü tesayur aser ketdangsertem dena lia Nagaland angh-i jembidang, Naga nunger oshi aser sobaliba ayak mesamadaktsüi ajungkettsüla, kechiyong oshi ya senso ka asoshi mezüngbuba par sobaliba ayak asütsü ta ayongzük. India nung senso ajak kasasa lir, anungji kati ka oshi angazüktepba ajanga kati ka akümtsübutepa alitsü ta paisa metetdaktsü.
CIIL ajanga India nung oshi tapu balala renlokdakja ajungkettsüba agi linük nung tangatettep aser telongjem adoker. Parnok ya Kohima nung October 06, 2016 tashi alitsü. Parnok rongnung Prof. D G Rao, Director, Shri V V Bhat, Senior Consultant, Dr R Ramamoorthy, Reader & Research Officer, Shri Beluru Sudarshana, Bharatavani Project Consultant, Dr. Chandan Singh aser Dr Hidam Dolen Singh, Bharatavani Project nung Senior Resource Persons nungertem dena lir.
Parnok den külemi senden alidang Nagaland nungi adenertemji Prof. D Kuolie, Dr.Pangersenla Walling. Dr.Mimi Kevichusa Ezung, (Department of Tenyidie, School of Humanities & Education, Nagaland University), Mr. Moa Longkumer, Jt Director, Mrs. Khriesenuo Solo, Mrs Akala Kin (State Council of Educational Research & Training -SCERT), Mr. K.T. Thomas, Additional Director (Department of Tourism), Mr Talitemjen, Asst. Director, Mrs Adela, Asst. Director (Department of Art & Culture), Mr. Pollem Tep, Additional Director, School Education, Mr Md Tabrej, Mr. James H K (St Joseph College), Mr. Bijen Kumar (Centre for Naga Tribal Language Studies) nungertem liasü.
Iba senden nung jembidang, Nagaland anghi Bharatavani project ajanga Nagaland nung Naga nunger oshi ajungketja inyakba sentong nung akok tashi yaritsü ta metetdaktsü. Paisa Nagaland renloktsü asoshi shisalen teyuba reju ajaki akok tashi Naga nunger oshi mesamadaktsüi inyaktsü ajungshi. Paisa Univeristy nung sayurtemi talisa oshi renloktsüba maparen nung temulung tagütsüba agüja inyaktsü ajungshia liasü.
Bharatavani Project ya internet ajanga inyakba mapa ka lir aser (URL: www.bharatavani.in) iba ya ajanga India nung jembiba oshitem aser talisa Northeast India nung jembiba oshitem agütsür. Item rongnungji Naga nunger oshi Tenyidie (Angami),Ao, Chakru/Chokri, Chang, Dimasa, Kabui (Rongmei),Khezha, Khiemnungan,Konyak,Liangmei, Lotha, Nocte, Phom, Pochuri, Rengma, Sangtam, Sema, Yimchungre, Zemi/ Zeme nungertem dena lir.
Bharatavani ajanga tapu trok adoker, itemji Knowledge Section, Textbooks Section, Dictionary Section, Multimedia Section, Language Learning materials Section aser Language IT Tools Section-tem lir.
CIIL ajanga Nagaland nung oshi renlokba maparen nung shisatsü aser senotsü agi yarir aser parnoki Universities, Academies, Sahitya Sabhas, Tribal research institutions aser kija nungi asüyonga parnoki züluba aser adokba kaketem Bharatavani Portal nung enoktsütsü asoshi meshir. Bharatavani ajanga Nagaland aser Northeast nung tanga state-tem indang kaket 200 dak tali adoktsüogo. Ano, tangbo Android Smartphone nung “Bharatavani” App nung oshi aika aliba osep tulutiba ka angutsü.
Tang ama CIIL nungi tongtibang nisungtem arua alidang oshi nung mongin aser tesayurtemi parnok ajurua pei oshi wazüka ayutsü aser renlokdaktsütsü asoshi shisalemsateptsüla ta angh-isa metetdaktsü.