Nagaland Angh-i NU aser NABARD tenüng asang

Angh Acharya, NABARD ketdangser aser VC NU, Dr Pardeshi Lal den Raj Bhavan Kohima nung sensak asemba noksa nung angur.

Dimapur, Rongchii/April 8 (TYO): Nagaland Angh PB Acharya-i, Raj Bhavan Kohima nung April 8 nü lepa reprangshiba senden ka amenba mapang Nagaland University aser National Bank for Agriculture and Rural Development (NABARD), Nagaland Regional Office nati aluyimba tsütsü rongsen ketsüng nung jenjang ajungkettsü atema entrepreneurship ajungketba atema parnok tenüng asang.
Kasa mapang nung Angh Acharya-i NU aser NABARD dang entrepreneurs tem parnok sasa menokdaktet tashi teyari agütsütsü asoshi mepeshiogo. Paisa, educational institution ka nükjidongji kaketshisatsü kija agütsütsü masütsüla saka kaketshirtem parnok sasa nokdaktettsüsa sayutettsüla, ta ashi. Maneni skill development program tem Nagaland nung college ajak nung tenzüktsü imlaba pai lemsatep.
Angh-isa state nung aliba alirongsen aser state aser lokti-i kechi nüngdaker aji bushitettsüla aser kaketshirtem entrepreneurs kümdaktsütsü atema academic skill course balala agütsütsü nüngdakba lemsatep. Iba ajanga lokti rongsenketsüng nung tali renloka aotsü ta pai bilemba lemsatepba den iba ya educational institutions tem onük ka asütsüla ta shisem.
NU Vice Chancellor, Dr Pardeshi Lal aser NABARD Dimapur General Manager, Shri SK Dhumal nati iba institution anati achaayanga inyakba maparentem Angh nem metetdaktsü. Tenati ashiba agi, School of Agriculture Studies & Rural Development (SASRD), NU nung azünger kaketshir 62 nem AGM, NABARD Shri HV Biswas-i aluyimba tsütsü lenmang balala aika sadema aliba indang rasaa shiogo.
Maneni NABARD indang sentong balala dak sendakba nung University staff tem den sensaksema liasü aser parnok dang state nung self employment tsütsü maongka agütsütsü atema item sentongtem takok ngua benoktsü asoshi teyari agütsütsü aser teka amteper inyaktsü ajungshi.
Taoba mapang nung Angh Acharya-i lenla ajak nung terenlok bener arutsü asoshi NABARD dang state nung University tem den teka amteper inyakysü ajungshia liasü. Iba senden nung NU VC, Dr Pardeshi Lal, NABARD Dimapur General Manager, Shri SK Dhumal aser NABARD nungi tanga ketdangsertem dena liasü, ta Governor PRO sangdong ka ajanga metetdaktsü.