Nagaland angh-i SDRF tenzüktsü

Kohima, Jan.26 (TYO) : Mongolbar anepdang, linük Republic day amongba sentong den repsema Nagaland angh, P.B.Acharyai Secretariat Plaza, Kohima nung State Disaster Response Force (SDRF)  tenzüktsüogo.
Alima lendong aser nisungtemi mekümdangi aliba ajanga atalokba lendong timtem mapang yakta yaritettsü asoshi “Disaster Management Act 2005” ajanga National Disaster Response Force (NDRF) & State Disaster Response Force (SDRF) tentettsü latet ta Nagaland anghi metetdaktsü.
NSDMA ya tenzüker külen 9th IR, 10th IR, 12th IR, 13th IR, 14th IR, 15th IR nungi company kaka den ano Districts Executive Forces (DEFs) terka aser Tuensang nung village guards nem training agütsüogo.
Item SDRF purtemji state nung lendong atalokdang jet ta yaritettsüsa  tongtibang tesem 8 (eight) nung ayutsü. Parnok denji ano Civil Defence & Home Guards nungi teyariteper 240 alitsü. Parnok jagi ano maneni yimtak yimtsüng aser kaketrejutem nung tangatetba agüja inyakdaktsüner ta Nagaland angh-isa metetdaktsü.