Nagaland Angh-i SHG züngsemtem den shisa lemsatep

Monupii 21, 2018 nü Raj Bhavan, Kohima nung Nagaland Angh, PB Acharya den SHG Jakhama Block züngsemtem tangokba noksa nung angur. 

Kohima, Monupii/May 21 (TYO): Lokti terenlok aser lokti ajungtsü atema nisung shiai inyaktsü akok, aser iba atema tatishitsü tajung kaji Jakhama Block nungi Self Help Group züngsemtem lir, ta tanü Nagaland Angh, PB Acharya-i metetdaktsü.
Tanü Durbar Hall, Raj Bhavan Kohima nung Jakhama Block nungi Nagaland Rural Livelihood Mission SHG züngsemtem aser SVEP entrepreneurs den shisalemsatep sentong ka nung jembidang Angh, Acharya-i iba o ya jembia liasü.
Angh-i SHG’s dang tensa meyipa asadangtsü aser lokti tashi itshitsü atema asalentong tajung yanglur inyaktsü atema ayongzük, ta PRO to Governor sangdong ka nung metetdaktsü.
Paisa, “Lokti tashi aittsü atema SHG’s ajakji nodal agents asütsüla, ta ashi.
Angh-isa, “India ya yimtsüngtem meyong lir, aser yimtsüngtem azükarura India linük sentsüwanghitsü, ibaji temelung nung yur Central aser state sorkartemi yimtsüngtem tajangzük angutsü atema welfare programmes aika benoka inyaker,” ta metetdaktsü.
Paisa SHG’s dang parnok tashi itshitsü atema schemes aser programmes balala nungi tajangzük agitsü aser tanga yimtsüngtem dang welfare programmes balala metetdaktsütsü mepishi.
Pai ashiba agi, SHG’s ji rongsenkettsüng atema dang masü saka loktiliba atemaa tongshitem asütsüla.
Acharya-isa Pete Village Level Organisation, Kezoma-i Best VLO National Award 2018 anguba atema tenüngsang agüja, iba ya Village Level Organisation atema dang masü saka state atema-a tajangzüktetba tulu ka lir, ta ashi.
Iba sentong ya COO & Skills, NSRLM, Menuoneituo Chadi leniba nung agia liasü; Addl. Secretary RD & Mission Director, NSRLM, Athel O Lotha-i lokti pelaa agizük aser Khuzuma Entrepreneurs teloki sobaliba ken ka aten.
O lemtepba sentonga ka agi, aser iba mapang nung SHG’s-i marketing sheds aser plokti metsümeshidak nüngdakba lemsatepa liasü.
Sentong nungsa National Award 2018 angur, Pete VLO, Kezoma-i parnoki inyakba mapa balala metetdakja liasü, ta kasa sangdong ajangasa metetdaktsü.