Nagaland Angh-i yimobilem zülurtem den shisa lemsatep

Luroi/August 20, 2018 nü Police guest house, Chumukedima nung Nagaland Angh, P.B.Acharya,  DPRO Dimapur aser Naga nunger oshi nung adokba osangkaket balala nungi yimobilem zülurtem külemi tangokba noksa nung angur.

Dimapur, Luroi/August 20 (TYO): Tanü Police guest house, Chumukedima nung Naga nunger oshi balala nung adokba osangkakettem nungi yimobilem zülurtem den Nagaland Angh, P.B Acharya-i shisa lemsatepba sentong ka agiogo; iba sentong nung Angh-i, pai mepishiba nung ajemdaker Nagaland sorkari Karnataka state kübok Kodagu nung tzümetsüng lendong atema teyari sen lakh 20 agutsü, ta metetdaktsü.
Karnataka ya par state lir, aser Angh-ia pa nija sasep nung sen lakh 5 tenla agutsü, aser iba senji tim agency nem agutsütsü.
Tamangba yimsü mesüra nütsüng yongsük kecha mebendangi democracy nungbo ajak kasa dang lir, ta shia Acharya-i, osangkakettem ya fourth estate lir, aser loktiliba tangatetba melenshitsütsü atema osangkakettemi tongtibang shilem ka agitettsü, ta ashi.
Pei oshiji kanga tongtibang, ta shia Angh-i, pa Angh akumba sülen par jila nung University asem densema University 8 nung tribal oshi sayu tenzükogo, ta metetdaktsü.
Acharya-isa, subject balala sayuba dak alia University temi natural resources nungi rongsen adokdaktsütsü atema tesayuba agutsütsüla, ta ashi.
“Rongsen adokdakjang aser Nagaland tashi itshidakjang, Universities nokdak nung ang ibaji inyaktettsü,” ta shia Acharya-i Universities dang skill education agutsütsü ayongzük.
Paisa state rongsenkettsüng ajungkettsütsü atema shishilembabaren nung ajemoka inyaknertem yaritsü, ta ashi.
Shisa lemsatepba sentong nung Angh-i Naga nunger oshi nung adokba osangkakettem nung yimobilem zülurtem dang, item osangkakettem koma prokshia tazüngertem ket tongtsür, ta asüngdang.
Paisa, anogoshia adokba osangkakettem mapang shidak nung tazüngertem ket tongtsütsüji kanga tongtibang, ta metetdaktsü.
Paisa parnok dang nüngdak adokra pa ajuruang aser pai item timtemji reprangtsü, ta nangzük.
National programme balala agiba mapang nung temsüa aliba osangbenertem nem tim tetushi agutsütsü atema benokba dak sendakba nung Angh-i, tapet documents agüja tim lenmang ajanga inyakra iba onükji kanga junger, ta ashi.
Kasa sentong nung OSD & PRO to Governor aser DPRO Dimapur nata dena liasü.