Nagaland Angh P.B Acharya-i arem-shiruru wazüka ayutsü ayongzük

Dimapur, February 24 (TYO) : Hokolbarnü Assistant Conservator of Forest, Dimapur, Obed Bohovi Swu-i Nagaland Angh, P.B. Acharya den Raj Bhavan, Kohima nung ajurutepa Nagaland nung süngdonglidong aser shirurutem kümzüka ayutsü indang onük lemsatep.
Iba mapang P.B Acharya-i Nagaland nung arem min aser tobur tajung ozü aser shirurutem kümzüka ayutsü atema mapa inyaktsüla ta ashi. Paisa nisungtem dang shirurutem metepsettsü ayongzük aser Forest department dang lipoküm wazüka ayutsü atema lanurtem ajungmesotsü atema mapa inyaktsü metetdaktsü.
Angh-isa kiset shiruru aser ozütem mesütsü, kechiyong ibaji ajanga asenok anibelem ajema kümdaktsür, ta ashi.
Nagaland nung aliba arem-min teimbaka indang kiburtemji nübortem lir anungji Arogo, school aser yimtsüngtemi item arem-min wazüka ayutsü atema tesayubatem prokshitsüla, ta P.B Acharya-isa shisem.
Paisa, Naga nunger lanurtem ‘animals watching guides’ ama training agütsüba sentongtem ayongzüka agitsü aser iba ajanga lanurtem nem mapa agütsütsü atema tayongzükba agütsü.
Tanü Nagaland Angh-i Assistant Conservator of Forest nem Raj Bhavan nung mesütetba rabbit techanu ana kidang mesütsü atema sempet agütsü.