Nagaland Angh, P.B Acharya-i Mokokchung nung tesem balala semdang

November 18 nü Mokokchung nung Nagaland Angh, P.B Acharya-i Fazl Ali College auditorium nung tesayurtem aser kaketshirtem den jembiba noksa nung angur. (Mokokchung, November 18, 2016). 

Mokokchung, Nov 18 (TYO): Nagaland angh Wb. P.B Acharya-i Nov 17 nü Mokokchungi arua tesem balala semdanga jajaba den sorkar tenzüker aser mulungtet telok balala den mensem balala kayonga tebilembatem bentepa aser shisa balala lemsatepa mungdaki.
Hogulbarnü Swachh Bharat Mission den külem sür All Nagaland Taxi Association Mokokchung Zone-i ayongba ‘raising day cum cleaning drive’ sentong ka nung Nagaland angh P.B Acharya tongti tesemdanger ka ama arua, pa ket nungi dustbin aser kioktsü lemtsüba den “Nür Town Merüka Yuang” ta sür gari sticker ka dena tenzüktsüogo.
Pai iba sentong nung jembidang, taxi association kati town merükba maparen nung iba ama shilem tajung agiba asoshi pelaba metetdaktsü. Paisa driver-tem dang tarutsü nung pei sasa noktaktetba den parnok dang Jan-Dhan Yojana sentong kübok bank account lapoka maongka balala agia, gari anishir ka masü saka gari kibur kaka akümtsü asoshi ajungshia liasü.
P.B Acharya-i kaket riju balala sema jajadang, Tsüngrem tsübuba aser meimba nungji tashi, takok aser shisatsü dena lir, ta ashi. Paisa kaketshirtem dang shisatsüji pei kija atema dang masü saka kibong aser lokti ajungkettsü atema bushitsüla, ta tayongzükba ka agütsü.
Nagaland ya takar state ka kümtettsü lenmang lir, kechiyong yangi ali telung aser tema nung rongsen jenti aliba dang masü saka metatemji pa nung tobur tajung, ta paisa ashi.
Nagaland ya yimjung state ka kümtet, yimjungji kanga tongtibang aser ajaki aginür, aji oda, tang ya teti yimjung alitsü asoshi jembiba mapang ka lir, ta paisa shisem.
Yashi anghba Tuensang nungi menur aruba ajanga pai Fazl Ali College mesemdangtet nung, ibaji küpdoka tanü pai FAC semdanga yangji kaketshir aser tesayurtem den sensaksema liasü.
Pai Yisemyong nung aliba State Agriculture Research Station (SARS) semdangba mapang SARS-i inyakba nung temulung masüba o kar shia tarutsü nung tang dang nungi tajungba inyaktsü ajungshia liasü.
Anghisa nikongtsütsü Nagaland University H.Q Lumami aser Industrial Training Institute (ITI) Mokokchung na semdanga yangji kaketshir aser tesayurtem den sensaksemba den nüngdak balala lemsatepa liasü.
November 19 (Honibar) anepdang 9:00 ako meta Nagaland angh P.B Acharya Mokokchung toktsür Zunheboto leni aotsü ta osang ajanga angazüker.