Nagaland Angh P.B Acharya Mkg-i anogo ana semdanga lir

Nagaland Angh Wb. P.B. Acharya-i Mokokchung Town hall nung senden akadang jembiba yangi noksa nung angur. (Mokokchung, November 17, 2016).

Mokokchung, Nov. 17 (TYO): Nagaland Angh Wb. P.B. Acharya Mokokchungi anogo ananü amungi arua lir. Pa aruba temaitsü Mokokchung nüburtemi pa nem tetushi agüja pa agizükba sentong tajung ka Brihostibarnü yangi Town hall Mokokchung nung ayongzüka liogo.
Pa den pa temeim kinüngtsü Wt. Kavita Acharya-a densema arua lir.
Angh P.B Acharya-i pa agizükba sentong nung jembidang, Naga nunger rongnung Aorji mezüng maongka angur kin ka lir aser tanü Nagaland state koba jenjang nung lir, iba nung ya Ao kini shilem tulu agia lir, ta mezüngbuba tenüngsang agutsüba olen ka lemsatep.
Paisa Ao kin nungi nübu kar tetshia ashidang, yimden tsütsü mezüng Nagaland Chief Minister P.Shilu Ao, taoba Nagaland Chief Minister aser tang Odisha Angh Dr. S.C Jamir ama aser saisaponger Dr. T.Ao ama nübu tajung aika adoka state yangerba nung shilem tajung agibaji tesüngmangtsüka lir, ta metetdaktsü.
“India lima ya takar saka Indian nungerji sensaker, yamaji Nagaland ya takar saka Naga nungerji sensaker lir”, anungji, asenoki ibai khen aroka shisadangtsüla, ta paisa ashi. Lokti nem meyipa agütsüba nung asenok anünga lir, ta paisa shisem.
School nung mid day meal (MDM) agütsüba ya tepok süngdaktsütsü kisüng atema masü, saka ibai tanurtem school-i odaktsütsü jangradaktsütsü/ajungshitsü nükjidong nung agütsür, aji saka, school aika nung MDM ya hopta nung khen mesüra anaben dang agütsüba osang jangjaogo, ta paisa temulung masüba olen ka ashi.
“Nagaland tejakleni onüra asenok tama mulungsentsü melenshitsüla aser temelenshiji tangar kati kodanga bener marutsütsü, ibaji asenoki dang yanglutsüla”, ta paisa tayongzükba ka agütsü.
Nagaland nung ali tema aser telung nung rongsen jenti lir, anungji, Tsüngremi agütsüba iba temoatsüji tamshi shia amshitsü aser rongsen rendaktsütsü asoshi paisa inyakdaktsünüba o ka ashi.
Naga lima ya pa nung tobur tajung, saka teraksa jenti aliba ajanga lokti jenjang mara maketi kümogo, anungji, lokti ajaki teraksa anema noktaktsüla aser tamangba yimsü balalai iba nungji shilem tulu agitettsü, ta paisa shisem.
Paisa yimden onük kar shipokdang, tang koba NSCN (IM) o India sorkar na yimjung kishi lapoka “solution” onük indang jembidaki, India Prime Minister Modi lenisüba nung ibai kanga süoki ia bilemer aser solution agütsütsü mulunga aliba mapang ka lir, anungji, “Naga nunger ka küma lungjemtsüla”, ta paisa ayongzüka ashi.
Tang koba Modi sorkar mapang sen note 500 aser 1000 dak sentakba nung maparen ka inyakdaki, ibai nübur rongsenkettsüng nung tashi itdaktsütsü nükjidong nung tenzükba lir, ta paisa ashi.
Tanü iba sentong nung Mokokchung Deputy Commissioner Wb. Sushil Kumar Patel IAS, Ao Senden tir mapa bena alisang Wb. C. Angang Jamir, Watsü Mungdang tir Wt. Moachila parnokia o tatsütsü jembi. The Refiners teloki sobaliba kensü nung ken tajung ka tena telok saksalemdaktsü. Tesayur Wt. Narola Neizo iba sentong nung menden liasü.
Iba sentong nung sorkar tenzükertemi anir Mokokchung nung aliba mulungtet telok balala nungi ketdangsertem aser school balala nungi kaketshirtem arua adenba ajanga sentong tali meraketdaktsü. Tanü iba sentong nung 28 Koridang Assembly Constituency nungi MLA Wb. Imkong L Imchen densema liasü.
Nagaland angh P.B Acharya agizükba sentong agir külen, pai Mokokchung District jail semdanga tepuokdak alirtem den sensaksema liasü. Iba sülenji Dr. Imkongliba Memorial District Hospital (IMDH) semdanga yangji shiranga amunger aser Doctor-tem den ajurutep. Nikongdang Senior Citizen, Civil Societies/eminent citizens/NGO aser telok balala den mensem aka. Tanep pai Fazl Ali College semdangtsüba sentong renemer liasü, saka pa Tuensang nungi menur aruba ajanga mesemdangtet.
November 18 Hogulbarnü P.B Acharya-i Yisemyong nung aliba State Agriculture Research Station (SARS), ITI Mokokchung, N.U Lumami aser telok balala den ajurutepa sensaksem akatsü. Iba sülen Nov 19 anepdang Mokokchung toktsür Zunheboto-i aotsü sentong renema lir.