Nagaland aser Assam Angh nem sodi agütsütsüla: K Therie

Kohima, November 23 (TYO): Nagaland aser Assam Angh-i ‘Hindustan ya Hindu nunger atema’ ta jembibaji pa ama lenir kati jembiba o memesük aser iba olen magizüker, ta Hombar nü K. Therie-i sangdong ka nung ashi.
“Pa nem state ana Angh mapa nungi sodi agütsütsüla aser pa tamangba yimsü maparen inyaktsü atema mapang peria agütsütsüla. India ya Hindu nunger atema Hindustan ta jembiba o ajanga Nagaland ama Khristan State ka atema pa shimba asalentong jungkai adokogo,” ta Therie-isa ashi.
“Khuret makaba o jembirtemji linük nung temzüng ozüng tebilemtsü adokdaktsürtem lir. State ana nung Ozüng amer tekolak ka asünungji, pai jembiba o nung kanga kümdanga jembitsü imlar. Pai India Temzüng nung secular akhümket meyutetra pa tangsa melentsü onoki akhanger,” ta Therie-isa metetdaktsü.