Nagaland aser Assam arrtsülen Gabroo Peace Festival amung

March 20, (Agencies) : Assam aser Nagaland arrtsülen alirtem tesentaktep tajung nung libalirodaktsütsü mechi nung Jorhat aser Mokokchung district anasa aliba Gabroo tesem nung Peace Festival-2016 mungogo.
Iba sentong ya Gabroo Tourism Development Committee aser Border Peace Coordination Committee (Assam-Nagaland) (BPCC(A-N)) nati ayonga amung.
Iba anogo asemnü amungba benjung ya March 18, 2016 nü nungi tenzüka amung aser iba mapang Nagaland nungi yimtsüng 6 aser Assam nung yimtsüng 9 nungi adenshia o agizüktepa jembishinüa liasü. Iba den külemi  “Gabroo Peace Flag” ajungketa sensaksema chiyungtep. Nikong tsütsü volley ball asaya liasü aser Honibarnü final asaya nung Assam team (Sotai)-i Nagaland (Tsuremmen village) madak takok angu.
Iba yimjung benjung sentong atema Mariani LAC Rupjyoti Kurmi, Parliamentary Secretary (Power, Govt. of Assam) aser Alongtaki LAC Dr. Benjongliba Aier, Parliamentary Secretary for Agriculture & Chairman NSAMB, Govt. of Nagaland nati tenla tulu agüja sentong takok ngudaktsü.
Alongtaki MLA-i tenlaba rongnung iba senden amenba hall densema lir aser iba hall nem Dr. Benjongliba tebu, asür Ngangshikaba (J.N. Aier) tenüng agütsü.
Iba benjung tatemnü state anaprong nungi tarutsü nunga kasa yimjung nung alitsü atema sensaksem tajung ka agia liasü.