Nagaland aser Assam lokti tentettem longjemtsü bangjem

Guwahati, October 03 (Agencies): Nagaland aser Assam na nungi lokti tentettem longjemer mangatettep bentettsü aser state ana nübur tsüngda tamang katepa alitsü asoshi lemtetogo.

“Naga-Assamese Round Table Talk” senden nung state anaprong nungi teshimtet züngsemtem October 9 nü Guwahati nung ajurutepa olemteptsü. Iba sentong ya Nanda Talukdar Foundation (NTF)-i acha ayanger.

NTF-i ashiba agi, state ana tsüngda küm aika mulung melemtepi aliba tesentaktep junga maliba agientsü mapang ka nung state anaprong nungi lokti tentettemi iba ya apitetogo.

Nagaland nungi züngsemtemji yimjung atema inyaker, Niketu Iralu lenisüba nung Naga Hoho Tir, Chuba Ozukum, Naga Mothers’ Association Adviser, Rosemary Dzuvichu, Naga Students’ Federation (NSF) Tir, Subenthang Kikon nunger densema lir.

Ano Assam nungi züngsemtemji shisashir, Udayan Misra lenisüba nung Asom Sahitya Sabha Tir, Dhrubajyoti Bora, AASU tongti shisalen tuyur, Dr Samujjwal Bhattacharya, Purbanchaliya Tai Sahitya Sabha Tir, Dayananda Borgohain, taoba Upper Assam Commissioner, Sayad Iftikhar Hussein nunger densema alir.

NTF-i sangdong ka ajanga, “Iba mapatong ajanga linük ana tsüngda mapang talangka mulung melemtepi aruba anener state ana nüburtem tsüngda akhümtsübutep, tamang katepba aser amaliteptsü atema otsü tasen ka tenzüktsü imlar,” ta ashi.