Nagaland aser Tripura Anghtemi Ruzazho yimtsüng semdang

April 25, 2017 nü Ruzazo nung Nagaland Angh, P.B Acharya aser Tripura Angh, Tathagata Roy nati Subash Chandra Bose  indang nüngshilung ka sayatsüba angur. 

Dimapur, April 25 (TYO): Nagaland Angh, P.B Acharya-i Ruzazho yimtsüng nung Subash Chandra Bose indang nüngshilung ka sayatsüogo.
Kohima rara aser iba ajanga India nüjiso atema inyakba mapa nung teyari agütsüba indang anogo ananü shisatokden sentong tenzükba mapang P.B Acharya-i nüngshilung sayatsü.
Tanü Nagaland Angh aser Tripura Angh, Tathagata Roy nati April 1944 nung Netaji Subash Chandra Bose-i anogo 9 nü atema amungba ki semdang.
India ya ‘secular democratic’ linük ka lir aser second class citizens shinga mali. India nung senso ajak kasa dang, ta Angh Acharya-i o jembidang ashi.
Paisa, Sardar Vallabhai Patel aser Netaji Subash Chandra Bose nungeri nüjiso atema inyakba mapa nung shilem tulu agiba indang jembi.
India Prime Minister, Narendra Modi-i India renloktsü süra, north east renloktsüla ta jembiba onük nung ajemdaker Acharya-isa ashiba agi, “India ya lanur linük ka lir aser linük nütsüng yongsük nung shilem 68 ji lanurtem lir. Ibaji asen linük atema rongsen lir, anungji state adena orr tangalen mapa inyakba Naga lanurtemi meyipa arur, state renlokba nung shilem agitsü ayongzüker.”
Angh-isa Naga Yimten tebilemtsü atema tatembang telemtetba ka agitsü atema Naga Yimten telok balala nung züngsemtem ajak sabang ka kübok külemi longjemtsü mepishia metetdaktsü.
Ruzazho Village Council Chairman-i yimdaklirtem ajak tenüng nung Nagaland Angh nem memorandum ka agütsü. Iba nung Ruzazho ya National Heritage village ka akümtsü atema shia lir aser Angh-i iba onük atema mapa inyaktsü ta nangzük.
Ruzazho yimtsüng ya Indian National Army (INA)-i ketdang asüba mezüngbuba yimtsüng ta züngshir.