Nagaland asoshi alima tatem !

India lima tatem külen Kerala state nung oagi Nagaland Police truck gari ka anena lir aser iba gari nungji Nagaland nung alir tsümar takar kati sen aser hon ama belena bener oa ayur ta Kochi nung Income Tax department ( Intelligence & Criminal Investigation) teloki puteta metetdaktsübaji Naga nunger asoshi taoksatsü, takoksatsü aser taaktsü osang ka lir. Alima nung police department tenteta police ayuba ya ozüng raksar, ochimashir aser ashir-auer mittsü aser aputsü asoshi ayur. Iba tsümarsang ya nisung ka tenüng agi MKR Pillai lir aser pa ya Nagaland nung mapang kabo Additional SP liasü aser tanga Police department nung pa ya Consultant (MT) lir ta angazüker. Iba jagi pa ya Nagaland police department nung kangasa tongtibang nisung ka kümdakja amshir amato angatetter. Ashiko, Naga nunger yimsüsür aser tulurtem aika chisubo par kidang yua alitsüa akok. Iba ama nisung ka ket nung sen crore meyirijang junga indang rongsen akabaji tesüngmangtsüka lir. Temoatsüsa rongnunga Nagaland nung ali langa moatsüogo ta bilemer. Parnok ket nung rongsen aliba ya Income Tax purtemi temulung malem bushitsü tenzükbaji India nung sen meyirijang aser noklang pongo note melenba mapang parnok ket nung rongsen akaba sen crore 50 jenjang metetdaktsüba nungi tenzükba liasü. Atangji, sen crore 50 jenjang rongsenjia pai aaba nungi aruba rongsenbo memesük aser meputep liasü. Ibayongji, IT purtemi bushisüngdangtsü tenzük aser idangjibo sen crore 50 jiang masü saka sen crore meyirijang jenjang rongsen nguteta lir. Atangji, item rongsentemji Nagaland nung ochimashiba mapatem nungi bendenba asütsü ta temulung melemi bilemer, ajisüaka ibaji shitak asü taiar ibajibo IT purtemi bushisüngdangyonga aodang metettsü. Ajisüaka, Naga nungertem atema telangzüba nüngdakbaji kechi atema Nagaland police truck gari ka Kerala nung oagi amshir ta asüba tasüngdangba ya asütsü. Ozüng raksaba, ashi auyaba aser ochimashiba mapa inyakertem mittsü aser aputsü asoshi public sen agi police department lapoka lir. Ajisüaka, police-temiang police gari nung ozüngi memelaba oset benra aser policetemiang ochimashi mapa inyakra Nagaland asoshibo ibaji alima tatembang asütsü. Idangjibo, nübortem dang tauyatetter tashibo auyaang, rakzükratem asüyonga kecha masü aser ozüng kübok alibajiang pei asoshi takoksa asütsü ta ayimoktsütsülang asütsü. Tangar lima nungbo police-tem ya ozüng raksartem mitertem dang masü saka police-tem ajanga pei lima topur jungdaktsür. Aji oda, police uniform tajung shitak semer senzüba kija agi alima aküm aketer. Ajisüaka, Nagaland nungbo aiben police-tem uniform-bo asem saka mera maket, quality majung, button junga matang, longpant külen nepketa asem, tsüngsem lisobo memesü, polish-bo metepdang ta senzüya angutsü. Item nemji chiyongtsüa koma agütsüar ashitsü makok. Aji oda, state police ya temenünütsüka aser tetsübutsüka masü saka saka aküm taket teyarir tajung ama nübortem tsüngdang litettsüla. Aji oda, police-i inter-state gate adena aruba aser aoba garitem nung ozüngi memelaba oset aser chiyongtsütem mita aputsü melen police gari nung dang belendaktsüra, oset jenjangjibo sen crore meyirijang ka indang asütsüa akok saka iba jagi Naga nunger akoksadaktsübajibo sen crore million agia memenoktettsü. Tanü yangi Kerala tashi nung oagi Nagaland police gari senzüa mapa inyaktsüsa akümba tia indang jembidang, Nagaland nung yimsüsür aser tulurtem ya tsümar kar den nübortem meyong sen lemsatepa mechira jangramatemer asü (?) ta bilemer. Asenokbo yimsüsür aser tulur süaka tsümar kar teyari magira police department moutetter asü ? Supply deparment mapatema tsümar kar den tajangzük lemsatepa meinyakra meinyakteteter asü ? Tsümar ka nem Naga nunger meyong sen mechidaktsüra Naga nunger sahib-temibo Delhi nung kecha mejembitetter asü ? ta tasüngdangba aika arur. Tang yabo joko Naga nunger yimsüsür aser tulurtemi tetsüngda nung tsümar chanu ka mayu agibo center den jembitettsüla aser Naga nunger public sen agi pei sen kümer mashimashi amshia tsümartem den lemsaa magitsüla aser mamshitsüla.