Nagaland asoshi terata !

Nagaland tatar senden nung opposition kata mali akümba nungi tenzüka mapang tatsüka nung ano tang opposition dang masü saka koba party-i yimsü asüar memetetka küma ogo. NPF teloki T.R.Zeliang küm trok asoshi aridok saka aridoker alisangi government anir aor. Aji oda, government-bo NPF teloki aniba DAN government saka NPF telokiang parnok anema okadak ken o agüja lir. Iba ama terata tensa tia ka nung Nagaland yimten odagi. Iba ama asüng kechi ataloktsüar memetet terata tia nung alidang, alima aser nübortem memeimertemibo nübortem akoksatsüsa mapa tulu inyaktsü koka lir. Ibaji dang masü saka ano Naga yimten tebilemtsü latettsü asoshi NSCN-IM telok o India government nabo tatembang küma jembiogo ta angazüker. Iba terenemba nung tendaktsütsü atema tang Naga kin shia nungi lenirtem NSCN-IM lenirtemi Delhi nung jaoka sensaksemba otsü angashiogo. Aji oda, Naga nungertemi aginüba ama NSCN-IM telok kija den masü saka Naga nunger yimten tenzükertem telok ajak dena Naga yimten tebilemtsü ya tatembang küma  latettsü asoshi India government o NSCN-IM telok na pronglai mulunga agizükogo ta angazüker. Ibayongji, India government tenüng nung jembir Ravi ajanga Naga nunger lokiti tentettem dang masü saka linük tenzükertem telok ajak ajurua shisalemsateper südi. Ibaji shitak asünungbo Naga yimten ken o jembiba maparen shitak odagi aser joko tatembangleni arur südi ta angetetter. Item maparen ajakji shitak takok ngua ao nungbo, tang linük nüjiso anguba anogo 15 August nü India ato kilonser, Narendra Modii Naga yimten tebilemtsü kokteta tangatettep kati aruba osang sangoktsüner amato osang kar ajangabo angazüker. Ibaji shitak atalok nungbo, tang aliba Nagaland government ya khen atemabo anentsüa akok aser akhidang 1963 küm Nagaland akümdang interim body ka shima tenzük amato election agia government maküm tsüngda Nagaland anepalutsü asoshi nisung kar shimtsüa akok.Iba amaji ka taküm kümsa atalok nungbo tang NPF telok pur belemba ya amajok nung belemer asütsü. Iba amaji Nagaland yimten nung teratatsü aika lir. Iba amaji ka matalok nunga, tang Nagaland nung  party tasen ka tenüng agi Democratic Peoples’ Party (DPP) tenteta lir aser yangji tang Lok Sabha MP Neiphiu Rio adentsü ta olulu ka jembia angashir. Atangji, iba olulu nungji tamangtsüa keta lir, kechiyong par nisung tongti purtem iba telok nung dena lir. Aji oda, tang government bener aoba NPF teloki pa NPF tir asütsü shim aser pa mulungbo DPP nung lir ta süra kobi melii Naga nungertemi meimlaba temelenshi ka yimten nung angutsü. Aji oda, tang ya Nagaland nung yimten lenirtem taruba küm tetenzüklen election agitsü alinungji, iba atemaji renemtsü asü mesüra Naga yimten telatetba ka dangi arutsü anasa alinungji iba atemaji atatsü ta asüba terata tia ka nung lir. Nagaland yimten nung yamaisa ao nungbo, nübortem teti terata nung alitsü aser nübortem ratatepdang yimsüsürtemi Nagaland yoka chir alitsü. Tanga department aika tsümartem dang yokadoker, parnok dang dang asüngdanga inyaker. Aji oda, Nagaland ta asüba ya tenüng dang ashi, kiburbo tsümartem lir. Iba jagi balaka yimten ya aiben anokshitetter südi ta bilemer. Item ajak yutsür ano nübortem asoshi terata tulutibaji sangküm küm tetenzüklen election agi nungbo shiba aser koba telok nem vote enoktsütsü ta asüba terata tia ya asütsü. Parnoki tejashi saka nübortemi tang yimsü tesüdak purtem maginer saka ano parnok dang nungi tajungba candidate mangur. Iba terataji kokteta Nagaland timtem tekangshi tia nungi anitettsü atema, tang yimsü tesüdakpurtemi Tsüngrem aser nübortem dang pei tashimait nangzüka, taküm tasen kümer election nung tokteptsüla aser ano külen tang yimsü tesüdakpurtem atsüngdoker temelenshi tajung ka Nagaland-i bener arutsü atema nübor meimba aser Tsüngrem akümtsübuba lanurtemi tasü itshir ‘Clean Election’ tangatetba nung  election-i aitsüla !