Nagaland asoshi yangluba sentong kaket ka adoktsü

Kohima, May 05 (TYO): Center sorkari terenlok mapatem inyaktsü yangluba sentong “North East Vision 2020” aser “Act East Policy” amato Nagaland state kija asoshi terenlok sentong balaka adoktsü atema tang inyaktepdagi aser ibaji ita ana-semka tsüngda renemtsü, anungji nübortemi pei bilemba shisatsü lemsatepdaktsüner ta tanü Brehostibar nikongtsütsü Chief Minister T.R. Zeliang-i metetdaktsü.
Pai iba o ya Zeliang Officers’ Association purtemi pa nem Global Leadership Award ngutetba asoshi tenüngsang agütsüba sentong ka Chief Minister official kidang ayongzüka akaba mapang metetdakja liasü.
Tawa Indonesia yimtiba, Bali nung oagi “Global Award for ‘Life Time Achievement in Transformation’ sempet anguba sülen Chief minister, T.R.Zeliang-i Delhi nung ato kilonser Narendra Modi ajurua jembidang, Nagaland asoshi “Vision Document” ka renemdagi ta metetdaktsü.
“Northeast renloktsü asoshi India sorkari sentong ana tashi, ka North East Vision 2020 aser kaji Act East Policy liaka, itemji Northeast nung mapa küma inyakba mangur, anungji tezü külen nungi onokia onok dak apet sentong ka yanglu tenzüker,” ta T.R.Zeliang-isa ato kilonser nem metetdaktsü.
Iba “Nagaland Vision Document” ya ita anasemka tsüngda renemtettsüa akok, anungji nübortemia iba sentong nung enoksemtsüsa Health, Education, Roads, Power, Water Supply, Environment ama nung tebilemba shisatsü agütsüdaktsüner ta paisa mepishia metetdaktsü.
Chief Minister-isa ashiba agi, taoba küm asem tsüngda Nagaland state sorkari maparen aika nung takok ngua inyakogo saka itemji taruba küm 5 tsüngdaang tenük agibo angutsü. Item takoktem rongnung Nagaland nung National Highways trok yanglutsü Centeri agizükogo, anungji taruba küm tsüngda Nagaland nung aliba lenmangsa tajungba asütsü imlar ta paisa ashi.
Paisa ashiba agi, tang South East Express Highway yangludagi aser iba lenmang jagi Nagaland ajangtsü, anungji Nagaland ya India o Myanmar na tsüngda tesem tajung ka akümtsü.
Chief Ministerisa ashiba agi, pai Indonesia nungi agizükba “Life Time Achievement in Transformation Award” ya pa kijai inyaktetba takok asoshi masü aka Naga nunger ajaki anguba takok ka lir. Iba Global Award anguba ajanga nübortem pelatepba ngur nia kanga nümadanga kümogo aser iba sempet anguba ajanga tangar lima aika den tesendaktep tajung yangluogo ta paisa metetdaktsü.
Chief Minister-isa Nagaland assembly nung tatar ajaki pa dak temulung lemteta maongka agütsüba asoshi pelaba metetdaktsü.
Zeliang nunger sorkar mapa nung ketdangsertem dang tajungshi ken o ka ashidang,  Zeliang nunger sorkar mapa nung  officer ishika dang, anungji longjemer kati ka yaritepa inyaktsüla, iba jagi dang tangari asenok reprangtettsü ta Chief minister-isa ayongzük.
Iba sentong nung, Angau I Thou President (ZOAN) menden liasü aser Dr Hiabe Zeliangi tepela o metetdaktsü.