Nagaland assembly election atema nüboyimba tembangogo

Kohima, Tsüklai 25 (TYO): Nagaland nung Tsüklai 27 nü agitsü aliba assembly election atema nüboyimba sentong taonung tembangogo; nüboyimba mapang nung NDPP-BJP teloktep aser ruling NPF na tsüngda kanga aitsütepa aruogo.
Naga People’s Front (NPF)-i nomination file asüba sülen National People’s Party (NPP) den loktepa liasü, aser nüboyimba mapang nung parnoki NDPP aser BJP teloktep aija aruogo.
Election magidangyongi party tasen, Nationalist Democratic Progressive Party (NDPP) aser BJP na loktepa parnok tsüngda menden 40:20 lemsa, aser election nüboyimba mapang nung Chief Minister candidate, Neiphiu Rio-i tesüiba küm pezü tsüngda NPF nung mepetmesü aliba aitsüba den külemi parnoki state nung temelenshi bener arutsütsü nangzük.
Nüboyimba mapang nung Ato kilonser, Narendra Modi-i Tuensang nung nüboyimja jembi aser Union Defence Minister, Nirmala Sitharaman-i Dimapur nung nübuyimtsü. Iba dak alia Union Minister of State for Home, Kiren Rijiju den BJP secretary aser North East incharge, Ram Madav nati state tesem balala ung nüboyimja liasü.
Tan election nung Congress-i menden 18 nungdang tokteptsü, aser Nagaland atema AICC Observer, Capt Praveen Davar-i nüboyimtsü.
Tan election nung menden 59 atema candidate 195-i tokteptsü; 11-Northern Angami-II menden nungbo taoba mapang asemben tashi Chief Minister inyaksang, Neiphiu Rio den tokteper makai pai takok nguogo.
Tan election nung NPF-i menden 58, Congress-i 18, BJP-i 20, NDPP-i 39, NPP-i 25, NCP-i 6, JD(U)-i 13, AAP-i 3, LJP-i menden 2 nung tokteptsü aser Independent candidate 11 lir.
Ano menden ana tashi nung tokteper candidate ka dang lir; taoba mapang state Chief Secretary, Alemtemshi Jamir-i NDPP ticket nungi Angetyongpang aser Mongoya menden na nungi tokteptsü.
State nung menden 15 nungbo NPF-BJP aser NPF-NDPP candidate tsüngda dang tokteptsü.
Candidate timba aliba mendenji Mokokchung district kübok 21-Tuli Assembly Constituency lir, aser iba menden atema candidate 7-i tokteptsü.
Tang teinyakdak Chief Minister, T R Zeliang-i NPF ticket nungi 7-Peren A/C (Peren district) nung NDPP nungi Iherie Ndang aser Independent candidate Kengim Kulimbe na den tokteptsü.
Taoba mapang Chief Minister, K L Chishi-i BJP ticket nungi 32-Atoizu menden (Zubheboto district) nung NPF candidate, Picto den tokteptsü.
Ano Mokokchung district kübok 23-Impur A/C menden atema 12 NLA Speaker, Dr Imtiwapang Aier-i NDPP nungi retired Nagaland Commissioner, T N Mannen den tokteptsü.
State nung voters 11,91,513 lir, aser iba nungjagi tebur 601707 aser tetsür 589806 lir.
Election atema state police dak alia Central Armed Police Force company 281 lemzüktsüogo aser sorkar mapa inyaker 15,000 dak tema mapa lemzükja liasü.
Election observers ajak agi 55 lir aser iba nungjagi general aser Election observers metsür anana aser Police observer 11 lir.
District 12 nungi polling station 2156 lir aser Tsüklai 27 anepdang 7:00 ako nungi nikongdang 4:00 ako tashi election agitsü.