Nagaland Assembly nungi Congress MLA 7 anentsütsü onük benok

Kohima, September 04 (TYO): Tanü Nagaland nung Congress Party-i par züngsem tenet State Assembly nungi anentsütsü asoshi benokogo. Züngsem 60 aliba Nagaland Legislative Assembly (NLA) nung tang Congress züngsem ti lir.

Tanü nikongdang osangbener den jembidang Nagaland Pradesh Congress Committee (NPCC) Tir Kewekhape Therie-i, Indian National Congress Central lenirtemi tashi agütsüba nung ajemdaker state nung Congress lenirtemi tanü nikongdang Assembly Secretariat nung NLA Speaker Chotisuh Sazo nem Congress MLA tem anentsütsü asoshi temepishibaji agütsüogo, ta ashi.

Pei adokba chichiba yimtenren party (INC) nungi parnoki züngsem voluntary süa toktsüba dak sentakba nung NLA-i lateta aliba ama anti-defection aser temzüngtem alema inyakba atema Congress MLA ti nungi parnok tenet anema iba temepishiba benok, ta paisa ashi.

NLA nungi anentsütsü asoshi benokba Congress MLA temji- Tokheho Yepthomi, S I Jamir, C Apok Jamir, Hukavi Zhimomi, Eshak Konyak, Dr Imtiwapang aser Khekaho nunger lir.

Taküm February 4 nü state assembly nung confidence motion mapang Congress MLA tipronglai NPF-i aniba DAN sorkar nung Chief Minister TR Zeliang lenisüba atema vote agütsü. Ibaji ajanga Zeliang-i parnok ajak ministry nung shimoka Minister, Parliamentary Secretary aser Deputy Speaker ama portfolio balala agütsü.

NPF-i aniba DAN sorkar nung adenba atema taküm May ita nung AICC-i Nagaland nung Congress MLA ti anentsüogo.

Iba dak sentakba nung Therie-i, “Parnoki inyakba aser INC party tetuyuba anema vote agütsüba atema Congress MLA tenet jagi voluntary süa parnok züngsem toktsüogo,” ta ashi.

Iba temepishiba nung MLA Imtikumzuk anemabo mebenokba atema tasüngdangba ka langzüdang Therie-i, “MLA tenet denji külemi Imtikumzuk-ia kaket ajak nung sign süaka, tangbo pa Deputy Speaker shimogo aser ibaji Anti-Defection ozüng küboki maiter,” ta ashi.

Ajisüaka pa anema-a benoktsü atema Party-i legal advice bushitsü, ta paisa ashi.

 “MLA ti jagi nüburtem tamang ashioktsüogo, kechiyong yimtenren party ka ama, election asoshi onok-a onok meyong manifesto lir aser Congress tangatetbatemji BJP mesüra tanga regional party tem dang nungi balaka,” ta Therie-isa ashi.