Nagaland atema akümketa agizüktettsüsa yimten latetdaktsüner

Dimapur, March 15 (TYO) : Eastern Nagaland Peoples’ Organization (ENPO) telok tenzükdang nungi tang tashi Naga nunger longjemer külenang yimten telatetba bushitsüla ta tangatetba nung nokdaka aruba ama, Naga nunger yimten temeten kümzüka ayutsü asoshi Naga nunger linük tenzükertem telok balala longjemer “Working Group” tenzükba asoshi pelar ta yashi Mongolbar nü ENPO lenirtemi Naga nunger linük tenzükertem teloktem den telongjem senden ka mena lemtetba osang ka nung metetdaktsü.
Iba senden nung ENPO lenirtem den GPRN/NSCN, NSCN ( Reformation), NNC (Z Royim/ V..Nagi), NNC/NPGN (Hozheto/Tsanthungo) aser NNC / GDRN ( Kiumukam/ Hetoi) nungertem liasü.
India government-i Naga nunger yimten tebilemtsü nung timtem ajuruba tia aser Naga nunger lushi ajak yimten ka kübok ayutsüba onüktem nung tangatetba tejangja metetdaktsütsüla, kechiyong Nagaland nung alirtem atema nübortemi akümketa agizüktetttsüsa yimten telatetba kabosa alitsüla ta parnokisa metetdaktsü.
Tang ya Naga yimten dak aketba ken o nung nübortem kanga mangmangtepba mapang ka lir, anungji iba ama mapang ka nung Naga nunger yimten temeten akangshitsü asoshi ENPO lenirtem o Naga nunger linük tenzükertem telok balala nungi lenirtem na ajurutepa Naga nuunger temeten wazüka ayutsü aser Naga nunger sobaliba aser tangatetba nung teti longjema alitsü atema ken o benoka jembiogo ta parnokisa metetdaktsü.
Tang putu nung Naga nunger lushi ajak yimten ka kübok melongjemtetyonga Naga nunger ajaki kasa kin aser kasa adianu ama bilema pei sobaliba aser otsü mamadoki kümzüka yutettsüla aser tarutsü lanur putu nungbo asen tsüraburtem mangdang atalokdakja longjemtettsüsa asenok tangatetba shisatsü nung mepilai teti longjema alitsüla ta ENPO aser Naga nunger linük tenzüker teloktemi metetdaktsü.