Nagaland atema asayatsü ta shia cricketer ka ashioktsü

Guwahati, March 31 (Agencies): Board of Control for Cricket in India (BCCI)-i ken o ka benokba sülen Delhi Police-i cricket asaya dak sendakba miimechi mapa inyakba ka bushisüngdanger.
Nagaland, Manipur aser Jharkhand state asem indang Ranji Trophy telok nung shimoktsü ta nangzükba agi Delhi nungi cricket asayar asem- Kanishk Gaur, Kishan Attri aser Shivam Sharma nungertemi ‘agent’ ka nem sen lakh 80 süpokrem agütsü ta osang ajanga ashir.
Ajisüaka, iba nisung jagi nangzükba ama masü saka taila ‘selection letters’ agütsü. Parnok ashioktsüba sülen par asemi BCCI nem osang iba sangoktsü.
BCCI indang Anti Corruption Unit nung regional integrity manager Anshuman Upadhyay-i iba osang jangjatsüogo aser asayar asem nungi shiditem aruba metetdaktsü.
Iba nung ajemdaker BCCI-i Delhi Police den ken o ka benok aser tang bushisüngdang südar.
2018 küm cricket coach kati pa dang Nagaland tenüng nungi ‘guest player’ ka ama Ranji Trophy nung asayatsü asüngdang ta Kanishk Gaur-i ashi.
Iba coach jagi pa dang Nagaland cricket team indang official coach aser tanga board züngsem kar den ajuruteptsü ashi. Iba sülen pa dang match pungu asayatsü atema sen lakh 15 meshi. Ajisüaka, Nagaland under-19 team nungi match ana dang asayaba sülen pa team nungi züngdok, ta Gaur-isa ashi.
Kechiba pa züngdoker ta asüngdangdang pa indang ‘selection letter’ ji taila ta telangzüba angu, ta paisa shisem.
Iba ken o dak sendakba nung coach kar aser Nagaland state cricket board züngsemtem dena nisung 11 dang asüngdangya südar.