Nagaland Backward Tribes Commission Bill benok

Kohima, March 18 (TYO): Tanü Brihostibarnü State Assembly nung Chief Minister, T R Zeliang-i Nagaland Backward Tribes Commission Bill 2016 benokogo.
Iba dak sentakba nung T R Zeliang-i, Nagaland backward tribe tem nem mapa wazüka yutsüba den külemi terenlok, shisaliok aser health tsütsü onük benokba inyakyim dak sentakba temetentem kümzüka ayutsü atema iba Bill ya nüngdak, ta metetdaktsü.
Iba bill ya state nung backward tribes temetentem kümzüka ayutsü atema Commission ka tentettsü atema lir, talisa Eastern Nagaland nung Longleng, Kiphire, Mon aser Tuensang district tem nungi backward tribes trok- Chang, Khimaniungan, Konyak, Phom, Sangtam aser Yimchungru atema lir.
Iba Commission ajanga backward tribe tem shisaliok, mapa aser anema-alibaren tsütsü shisadanga onüktem benoktsü.
Iba Bill ya agizükra State sorkari Nagaland Tribes Backward Tribes Commission nüngja nung tentet ka tentettsü.
Iba Commission nung Chairperson ka aser züngsem ana alitsü, züngsem ana rongnung tetsür züngsem ka alitsü aser kümsükji küm 5 mesüra parnok arishi küm 65 majung tashi alitsü. Iba Bill nung o lemtepa agizüktsü atema Honibarnü benoktsü.