Nagaland Badminton Ranking Tournament 2015 tenzükogo

Dimapur kübok Nagarjan kiyong nung ayongba Nagaland Badminton Ranking Tournament 2015 asayamong lapokba sentong nung tongti tesemdanger, Nagaland Parliamentary Secretary, Youth Resources & Sports, Khriehu Liezietsu-i o jembiba noksa nung angur. (Dimapur, November 20)

Dimapur, November 20 (TYO): Nagaland Parliamentary Secretary, Youth Resources & Sports, Khriehu Liezietsu-i lapoktsüba sülen Dimapur kübok Nagarjan nung tentetba Indoor Badminton Stadium nung Nagaland Badminton Ranking Tournament 2015 tanü, Hokolbar nü nungi asayatsü tenzükogo.

Nagaland Badminton Association (NBA) nungi temelaba agiba sülen Dimapur District Badminton Association (DDBA) den tangatettep nung Elite Badminton Club, Padumpukhuri teloki anogo 2 agia asayatsü asoshi iba asayamong ya ayonga lir.

Nagaland nung badminton asayar jenjang tarensena renemtsü nükjidong nung ranking yimya nung badminton asayamong 3 tashi taküm nungi tenzüka kümshi ayonga agitsü alizüng yua lir.

“Asayar aser asaya telok balala jenjang jangjatsü nükjidong nung asaya timbaka ranking yimya nung ayonga agir. Iba tangatetba nung Nagaland nunga ranking yimya nung asaya ajunga ayonga agitsü nungdaka kümogo,” ta tongti tesemdanger, Liezietsu-i metetdaktsü.

“Nagaland sorkari saisapong jenjang tajungba kümdaktsütsü asoshi senotsü jenti indoka nungdakba maparen inyakaka, Nagaland nungi tangar menepba asayartem madoker aser iba ya asayartem rong nung ranking maliba ajanga asütsü akok. Ajisüaka, tan nungi tenzüka asaya shilem ajunga nung ranking yimya amshiba ajanga Nagaland asayartemia national aser international jenjang nung tangar den toktepa shilem agitsü tamang akar,” ta pai ashi.

“Nagaland nung saisapongtsüren temaba jenjang nung ajungkettsütsü nükjidong nung iba ranking yimya ya tan nungi tenzüka benshi tenzüker,” ta NBA Tir & Nagaland PWD (R&B) Minister, Y Vikheho Swu-ia metetdaktsü.

Tarutsü anogotem nung Nagaland nunga national jenjang nung asayamong balala ayongtsü alizüng ayuba olen ka Swu-isa lemsatepa liasü.

Under 17, Under 19 , Seniors – 35+, 40+, 45+, 50+ & 55+ (Tetsür o tebur naprongla) densema tan asayamong ya shilem balala küma lemsar asayatsü renema lir.

Shilem ajak nung singles aser doubles tetoktepba alitsü aser takok angur ajunga nem senpet sen aser sempet balala agütsütsü renemogo.