Nagaland bandh nung shilem agitsü mepir

Dimapur, February 10 (TYO): Nagaland nung Civil Organizations, Tribal bodies aser Indigenous Citizens indang Joint Coordination Committee-i February 11, 2019 nü Nagaland Bandh nung adentsü atema mepishia metetdaktsü.
CAB ajanga tarutsü nung lendong bentsür arutsü asüba agi nisungtemi magizüker aser iba bill anema Bandh ayongba ya ozüngi melaba ama aser sensotemi pei sasa nübo agüja amungtsü, Media Cell, Joint Coordination Committee-i metetdaktsü.
India sorkari küm aika olemtep liaka telemtetba ka magiba atema Nagaland nung alirtemi mepelar. India sorkari “Election for Solution” ta ser Naga nunger ashioktsüba ajanga Naga nunger amokbanga lir. Anungji iba ama lokti sentong ajanga asenok jashiba sayutettsü, ta parnokisa ashi.
CAB 2016 ya Lok Sabha nung January 8, 2019 nü agizükogo aser India sorkari iba Bill ya Rajya Sabha nung mashii mapang ka nung benoktsü imlar. Iba osangji National Secretary, BJP Ram Madhav-i jangjashitsüogo. North East nung alirtem ahaki iba bill magizüki ola adoker ajisüaka Prime Minister-i nübortem sünemtsütsü atema NE state kar semdangba atema sasa bilemer, ta Joint Coordination Committee-isa metetdaktsü.
CAB ya ozüng kümra, lisopurtem kümzüka ayutsü inyakyim kecha mali, anungji India sorkari Bill agizüktsü meranga inyakba ya Northeast nunger taginüba mezüngmeshiba ama repranger, ta parnokisa ashi.
Nagaland bandh mapang tim masüba tatalokba kecha malitsü atema Kin Hoho tem aser GBs temi tenük yoka reprangtsü mepishir. Asen temeten, maongka, akhüm aser sobaliba kümzüka ayutsü ajungmesotsü atema iba sentong ayonger, ta Joint Coordination Committee-isa shisem.
Nagaland Bandh ya February 11, 2019 anepdang 6:00 ako nungi nikongtsütsü 4:00 ako alitsü.