Nagaland BJP-i Dipanker Dey khasetba aitsür

Dimapur, August 24 (TYO) : August 23, 2015 nü Dimapur nung 13 NAP (IR) telok kati kaketshir Dipanker Dey khasetba aser Ram Sahu yirutsüba tatalokba kukua aitsür ta State BJP Unit-i sangdong ka nung metetdaktsü.

Iba tatalokba atema PRO, Police department-i osang sangdongba party-i agizüker aser bangdak ketdangsertemi bushisüngdanger aibelener nem tapet temerenshi agüjang ta akhanger, ta General Secretary & Spokesman, K. James Vizo-i sangdong nung shia lir.

IRB jawan kati teinyaktsü ozüng alema inyakba mapa ajanga Nagaland nung sensotem timtem majurudaktsütsüla. Ano iba tatalokba ajanga Police department tenüng menük bener arutsütsü akok. Anungji tarutsü nungbo item tatalokba malitsü atema ketdangsertemi tekaratiba nung inyakyim reprangshitsüla ta BJP Nagaland-i metetdaktsü.

Iba tatalokba nung takoksa ajurur kibong nem bangdak ketdangsertemi teyari agüjang ta BJP Nagaland-i akhanger aser kasa mapang nungsa tasür kibong den asüku lemsateper, ta sangdong nungsa shia lir.