Nagaland BJP teloki NPF dang NEDA nungittsü mepishir

Kohima, June 02 (TYO): Tawa Assam election nung BJP teloki takok tulu anguba sülen BJP tir Amit Shah aser ato kilonser Narendra Modi nati anir Guwahati nung tentetba North East Democratic Alliance (NEDA) telok akok tashi nungitdaktsüner ta Nagaland tatar senden nung temendak BJP tatartemi tanü pangzüng ka ajanga metetdaktsüogo.
Tanü Brehostibar nü Nagaland tatar senden nung temendak BJP Legislature Party senden ka alidang iba pangzüng ya renema liasü. Iba kasa senden nung parnok ajaki mulunga T.R.Zeliangi aniba DAN sorkar nungittsü asoshi renemshiba osang ka dena metetdaktsü.
“2003 küm tentetba Democratic Alliance of Nagaland (DAN) nung adener telongjem tashi itshitsü aser ibaji ajanga 2018 küm agitsü aliba election nunga takok angutsü nükjidong nung onoki akokba tashi yariteptsü,” ta Naga nunger BJP tatartemisa metetdaktsü.
Tawa agiba Assam election nung NPF teloki temulung ajak agi BJP telok yariba asoshi Nagaland BJP MLA-temisa pelaba metetdaktsü. Iba ama yaritepba ajanga Assam nung BJP teloki takok tuluka nguogo ta parnokisa ashi.
Nagaland BJP MLA-temisa Assam Chief minister tasenba Wb. Sardananda Sonowal nem tenüngsang agütsü aser NDA nung adener yimten telok longjemer ano tanga Northeast state-tem nung takok ngua inyaktsü imlar ta parnokisa metetdaktsü.
Iba osang metetdaktsür BJP MLA-temji P. Paiwang Konyak, Imtilemba Sangtam, Dr TM Lotha aser Mmhonlumo nungertem liasü.