Nagaland BJP unit-i taoba Ato kilonser, Vajpayee ajuru

Kohima, Rongchii/April 26 (TYO): Rongchii (April) 26, 2018 nü BJP Nagaland Unit nungi teshimtet telok kati taoba mapang Ato kilonser, BJP National Tir mezüng inyaksang aser Bharat Ratna award angusang, Atal Bihari Vajpayee, pa indang official kidang ajuruogo, ta tanü Media Cell BJP Nagaland-i sangdong ka nung metetdaktsü.
Secretary Organisation, Ananta Mishra leniba nung BJP MLA tem- Higher Technical & Higher education Minister, Temjen Imna Along, Power Advisor, Tovihoto Ayemi aser state party nung inyakertemi pa ajuru. Taoba Ato kilonser den sensaksemdang State BJP lenirtemi taoba mapang pai mapa tajung aika inyakba aser taoba NDA yimsüsüba mapang nung pai state atema bilemja inyakba atema pa dang pelaba lemsatepa liasü.
Taoba Ato kilonser, Vajpayee tenüng nung pai jala ama agiba (adopt), Namita Bhattacharjee-i BJP lenirtem dang, mezüngbuba NDA yimsüsüba mapang nung sangdonga aliba Dimapur-Kohima four lane lenmangji Vajpayee arishia taküm alidangsa tembanga inyakdaktsüner, ibaji tesem atema alizüng ka tongtetba asütsü, ta mepishia metetdaktsü, ta kasa sangdong nungsa shia lir.