Nagaland Cabinet nung E E Pangteang shimok

Kohima, July 24 (TYO): Nagaland nung tawa tasen shimba Chief Minister T R Zeliang-i tanep E E Pangteang cabinet nung züngsemba ajanga Nagaland sorkar nung minister 12 menden abensaogo.
Tanep Durbar Hall, Raj Bhavan nung Angh P B Acharya-i EE Pangteang nem tenangzükba agidaktsü. Iba sentong nung Chief Minister TR Zeliang, State Assembly Speaker Imtiwapang Aier, tongti ketdangsertem aser tangartem aden.
TR Zeliang-i aniba cabinet nung NPF nungi minister 10 aser BJP nung minister 2 lir.
Nagaland Cabinet tasen shimba nung züngsemtemji, G Kaito Aye, Imkong L Imchen, Tokheho Yepthomi, Y. Patton, Kipili Sangtam, Dr Neikiesalie Nicky Kire, Kejong Chang, Neiba Kronu, E E Pangteang, Imtilemba Sangtam aser Mmhonlumo Kikon nungertem lir.
TR Zeliang-i asüngnep Advisors with cabinet status aser Parliamentary Secretary tem shimba sülen ang department tem lemzüktsütsü akok ta imlar.
Taoba Minister Paiwang Konyak-i osangbenertem den jembidang, Party high command-i Cabinet nung BJP MLA tejak tasentem shimoktsü atema tetuyuba agütsü, ta ashi.
“2013 küm BJP ticket nungibo ni dang takok angu aser tanüngba MLA asemji June 2014 nung NCP nungi BJP nung adenba lir. Ajisüaka, High Command-i cabinet nung temelenshi indang osangji kü dang sangoktsü” ta paisa metetdaktsü.
BJP Mon district nung mepelatep adoka lir, saka ni parnok nem angatetdaktsütsübaji kü tebilemtsü lir, ta Paiwang-isa shisem.
Tang cabinet tasen nung BJP MLA ana shimokba atema party tenüng nung pelaba metetdaktsür, ta paisa metetdaktsü.