Nagaland Career Workshop & Job Mela tenzükogo

November 17, 2017 nü Agri Expo, Dimapur nung Labour and Employment, Skill Development and Entrepreneurship Parliamentary Secretary, Dr. Neiphrezo Keditsu-i Nagaland Career Workshop & Job Mela nung o jembidang agiba noksa angur.

Dimapur, November 17 (TYO): November 17, 2017 nü Agri Expo, Dimapur nung Department of Employment & Entrepreneurship-i Nagaland Career Workshop & Job Mela tenzükogo.
Tanü sentong nung Labour and Employment, Skill Development & Entrepreneurship Parliamentary Secretary, Dr. Neiphrezo Keditsu-i o jembidang, “Nagaland Career Workshop & Job Mela tenzükba sülen mapa inyaktsü maongkatem aika angur” ta ashi.
Iba sentong tenzükba ajanga sorkar mapa nung nisungtem aniokogo. Tanü alima ya tetoktepertem aliba lima ka kümogo, anungji zünger mapa mangu aliba lanurtemi private sector nung pei dak aketba sempettem amshitsü ayongzüker, ta paisa ashi.
Naga nungerji sasapela, tobur ajungba, tejungnü atema tangar meteta lir. Anungji, asenoki asen dak temulung lemtetra, mapa kechisarena ajak jungjunga inyakettsü, ta Keditsu-isa shisem.
Iba sentong nung Nagaland Skill Development and Ent. Society, Consultant, Aditya-i workshop indang temetettsütem metetdaktsü.
Workshop nung medentetba tejangrartem aser tetemjen entrepreneur temi tarutsü anogotem nunga job interview atema tenüng agütsütettsü. Interview ji anepdang 9:00 ako nungi nikongdang 2:00 ako tashi alitsü, ta Aditya-ia ashi.
November 18, 2017 nü Nagaland Chief Minister, TR Zeliang-i “Aspiration and Capacity Mapping Study” ta ser kaket ka sayatsütsü. Paisa Department of Employment & Entrepreneurship indang website lapoktsütsü.