Nagaland CEO-i kaketshirtem dang khuret abenba vote agütsür ka ka akümtsü ayongzük

Kohima, August 9 (TYO): Bodbarnü Nagaland Chief Electoral Officer, Abhijit Sinha-i arishi küm 15-17 kaketshirtem den sensaksem mapang ka ayonga agi.
Tarutsü vote agütsütsüpurtem dang temetettsütem lemsateptsü aser parnok tarutsü nung khuret abenba vote agütsür ka ka akümtsü angatetdaktsütsü atema Abhijit-i kaketshirtem den sensaksem mapang agi.
Iba sentong ya Rüzhükhrie Government Higher Secondary School (RGHSS) indang school auditorium nung Class 2 nungi 12 kaketshirtem den agi.
Democracy tajung ka atema election ya tamendakdak lir aser election nung shilem agiba ajanga ajaki democracy maparen nung shilem agir aser ketdangsübaren tajungba akümer, ta tanü Sinha-i ashi.
Arishi küm 15 nungi 17 tsüngda alirtemji kanga dang tongtipang lir aser nenoki tongtipang mapa ka inyaktsü lir, kechiyong nenok arishi küm 18 ajungba sülen vote agütsütsü temeden angur, ta paisa kaketshirtem dang ashi.
Paisa, kaketshirtem dang shirnok electoral roll nung tenüng züluoktsü aser senso kati arishi küm 18 ajungba sülen electoral roll nung koma tenüng züluoktsü ta asüba osangtem metetdaktsü.
“Nü indang vote kijai temelenshi bener marutettsü ta mebilemtsüla, kechiyong nisung shia indang vote jagi asen linük democracy nung kongshir” ta Abhijit Sinha-isa shisem.
Sentong nung Deputy Chief Electoral Officer, Vikuo Vero-ia o jembidang, iba sentong ya Election Commission of India (ECI) ajanga tenzükba lir aser tarutsü vote agütsürtem nem osang sangoktsütsü atema lir, ta ashi.
Iba maparen kübok linük nung school 11,800 kübok kaketshir 25,11,594 tashi nem osang sangoktsüogo. Kohima nunga school ana- Mezhür Higher Secondary School aser Mt Hermon Higher Secondary School nung iba sentong agiogo, ta Vero-isa metetdaktsü.