Nagaland CEO-i Lok Sabha by-election atema metetdaktsür

Kohima, Rongchii (April) 27 (TYO): Monupii (May) 28 nü Nagaland nung Lok Sabha by-election maparen aser model code of conduct tiptema inyaktsü atema Commissioner Nagaland-i Returning Officer (RO) inyaktsü mapa lemzüktsüogo aser pa den Assistant ROs 13-i yarirteptsü.
Tanü Chief Electoral Officer (CEO) Nagaland, Abhijit Sinha-i osangbener den jembidang, RO den district 11 nungi Deputy Commissioner tem aser ADC Pughoboto den Commissioner indang office nungi ARO kati Assistant Returning Officers (AROs) ama yariteptsü ta ashi.
Election Commission of India (ECI)-i yashi by-election agitsü anogo metetdaktsü. Nagaland nungi taoba Lok Sabha MP Neiphiu Rio-i Tsüklai (February) 17 nü menden toktsüba ajanga by-election agitsüsa akümer.
Neiphiu Rio-i 11-Northern Angami-II A/C nungi NDPP ticket amer Assembly election nung toktep aser takok ngua tang pezüben atema Chief Minister inyaker.
Nagaland Chief Electoral Officer (CEO)-i ashiba agi, Monupii (May) 3-10 tashi anepdang 11:00 ako nungi nikongdang 3 ako tashi Commissioner indang office nung candidate temi tenüng agütsütsü akok.
Nagaland kübok polling station 2196 nung Electronic Voting Machines (EVM) den Voter Verifiable Paper Audit Trail (VVPAT) amshitsü, ta Sinha-isa shisem.
Taküm Aenjeti (January) 1, 2018 tashi nung Nagaland nung vote agütsür ajak agi nisung 11,97,438 (Tebur 6,07,589 aser tetsür 5,89,849) lir.
Election anogo nung voter’s identification alitsü aser iba atema tongtipang kulikaketji EPIC asütsü, ta CEO-isa metetdaktsü.
Taruba hopta nungi election nung shilem agitsüpurtem indang training tenzüktsü aser Model code of conduct tenzükba sülen sorkar advertisement aser policy tem kecha mesangdongtsü. Ano, ECI nungi temelaba mangu tashi sorkar mapa inyakertem mapa mebelenshitsü, ta paisa ashi.
Polling station ajak nung webcam mesüra camera enoktsü aser Commission-i maneni clean election osang prokshitsü ta Additional CEO, N Moa Aier-ia ashi.